ലണ്ടന്‍: വിജയത്തിനൊടുവില്‍ അലറി വിളിച്ച് സന്തോഷം പ്രകടിപ്പിക്കുന്ന സെറീനയോ, എതിരാളിക്കുമേല്‍ ഒറ്റ നോട്ടം കൊണ്ട് ആധിപത്യം നേടുന്ന പോരാളിയോ ആയിരുന്നില്ല ആ നിമിഷങ്ങളില്‍ അവര്‍. കുഞ്ഞ് ഒളിംപ്യയുടെ സ്‌നേഹനിധിയായ അമ്മ മാത്രമായിരുന്നു. വിംബിള്‍ഡണിന്റെ തിരക്കില്‍ മകളുടെ സാമീപ്യം ഇല്ലാതെയാകുന്നത് വിഷമിപ്പിക്കുന്നുവെന്ന് അവര്‍ ലോകത്തോട് തുറന്ന് പറയുകയായിരുന്നു.

പരിശീലനത്തിന്റെ തിരക്കുകള്‍ക്കിടയില്‍പ്പെട്ടതോടെ മകള്‍ ആദ്യമായി നടക്കുന്നത് കാണാന്‍ കഴിഞ്ഞില്ലെന്നും പിന്നീട് അതോര്‍ത്ത് കരഞ്ഞു പോയി എന്ന കാര്യം സെറീന തന്നെയാണ് ട്വിറ്ററില്‍ പങ്കുവച്ചത്. അത്രയധികം ഉള്ളുലച്ചതുകൊണ്ടാവണം ലോകത്തോട് അക്കാര്യം തുറന്ന് പറയാനും അവര്‍ തയ്യാറായത്. 

സെറീനയുടെ ട്വീറ്റ് ആരാധകരെയും കണ്ണീരണിയിച്ചു. വളരുമ്പോള്‍ അമ്മയെ ഓര്‍ത്ത് ഒളിംപ്യ അങ്ങേയറ്റം സന്തോഷിക്കുമെന്നും വിഷമിക്കാതെ ഫൈനലില്‍ ശ്രദ്ധിക്കൂ എന്നുമാണ് പലരും ഉപദേശിച്ചത്. അമ്മയെ നേരില്‍ കാണുമ്പോള്‍ നന്നായി നടന്നുകാണിക്കാനുള്ള പരിശീലനം ആയിരുന്നു അതെന്ന് കണക്കാക്കിയാല്‍ മതി എന്നായിരുന്നു മറ്റൊരാളുടെ മറുപടി.

ഞായറാഴ്ചയാണ് ജര്‍മ്മന്‍ താരം ഏയ്ഞ്ചലിച്ച് കെര്‍ബറുമായി സെറീന ഏറ്റുമുട്ടുന്നത്. കെര്‍ബറിനെതിരെ കളിച്ച എട്ട് മത്സരങ്ങളില്‍ ആറിലും വിജയം സെറീനയ്‌ക്കൊപ്പമായിരുന്നു. 2016 ലും സെറീന- കെര്‍ബര്‍ ഫൈനലിനാണ് വിംബിള്‍ഡണ്‍ സാക്ഷിയായത്.