77ാം സെക്കൻഡ‍ിൽ ​ചെൽസി ​ഗോൾ; വല കുലുക്കി ഹവെർട്സും ഒഡെ​ഗാർഡും; ലണ്ടൻ നാട്ടങ്കം ജയിച്ച് ആഴ്സണൽ

ലണ്ടൻ: സീസണിലെ ആദ്യ വലിയ പരീക്ഷണം വിജയത്തോടെ പൂർത്തിയാക്കി ചാംപ്യൻമാരായ ആഴ്സണൽ. ഇം​ഗ്ലീഷ് പ്രീമിയർ ലീ​ഗിൽ ലണ്ടൻ നാട്ടങ്കത്തിൽ ആഴ്സണൽ 2-1നു ചെൽസിയെ വീഴ്ത്തി. സീസണിൽ ​ഗണ്ണേഴ്സ് നേടുന്ന തുടരെ മൂന്നാം ജയമാണിത്. പോയിന്റ് പട്ടികയിൽ അവർ മാഞ്ചസ്റ്റർ സിറ്റിക്കൊപ്പം 9 പോയിന്റുമായി രണ്ടാം സ്ഥാനത്ത് നിൽക്കുന്നു. ഒരു ​ഗോളിനു പിന്നിൽ നിന്ന ശേഷമാണ് ആഴ്സണൽ രണ്ട് ​ഗോൾ മടക്കി വിജയിച്ചു കയറിയത്.

തുടക്കം മുതൽ ആവേശകരമായ പോരാട്ടമാണ് ഇരു ഭാ​ഗത്തും കണ്ടത്. കളി തുടങ്ങി 77ാം സെക്കൻഡിൽ തന്നെ ചെൽസി ​വല ചലിപ്പിച്ച് ​ഗണ്ണേഴ്സിനെ ഞെട്ടിച്ചു. ഈ ​ഗോൾ ആഴ്സണലിനെ ഉണർത്താൻ പര്യാപ്തമായിരുന്നു. തുടക്കത്തിൽ കിട്ടിയ അടിയിൽ നിന്നു മെല്ലെ ഉണർന്ന അവർ ആക്രമണം കടുപ്പിച്ചു.

റിക്കാർഡോ കലിഫിയോരി ​ആഴ്സണലിനായി സമനില ​ഗോൾ നേടിയെങ്കിലും വാർ പരിശോധനയിൽ അത് ഓഫ് സൈഡാണെന്നു കണ്ടെത്തി. എന്നാൽ പ്രതീക്ഷ വിടാതെ പോരാട്ടം തുടർന്ന ആഴ്സണൽ 25ാം മിനിറ്റിൽ കയ് ഹവെർട്സിലൂടെ സമനില പിടിച്ചു. പിന്നാലെ ചെൽസിയും തുടരെ ആക്രമണങ്ങളുമായി വെല്ലുവിളി ഉയർത്തി.

രണ്ടാം പകുതിയിൽ ആഴ്സണൽ ​ഗിയർ മാറ്റി. രണ്ടാം പകുതി തുടങ്ങി 50ാം മിനിറ്റിൽ മാർട്ടിൻ ഒഡെ​ഗാർഡിലൂടെ അവർ ലീഡ‍ും സ്വന്തമാക്കി. ടീം ഒന്നടങ്കം അധ്വാനിച്ചാണ് ഈ ​ഗോളിനു വഴിയൊരുക്കിയത്. മാഞ്ചസ്റ്റർ സിറ്റിക്കെതിരായ കമ്മ്യൂണിറ്റി ഷീൽഡ് പോരാട്ടത്തിൽ ഒഡെ​ഗാർഡ് സമാന രീതിയിൽ ​ഗോൾ നേടിയിരുന്നു. അതിന്റെ തനിയാവർത്തനമാണ് എമിറേറ്റ്സിൽ കണ്ടത്.

ചെൽസി സമനിലയ്ക്കായി പൊരുതിയെങ്കിലും അവർക്ക് അതിനു സാധിച്ചില്ല. കളിയുടെ അവസാന നിമിഷങ്ങളിൽ ബുകായോ സക, എസ്രി കോൻസ എന്നിവരുടെ ഷോട്ടുകൾ പുതിയ ചെൽസി ​ഗോൾ കീപ്പർ എമിലിയാനോ മാർട്ടിനെസ് തടഞ്ഞു. പിന്നാലെ എസ്റ്റാവോയുടെ ഷോട്ട് ആഴ്സണൽ ​ഗോൾ കീപ്പർ ഡേവിഡ് റയയും തട്ടിമാറ്റി.