ഗെലെഫു: അന്താരാഷ്ട്ര ടി20യില്‍ പുതിയ ചരിത്രമെഴുതി ഭൂട്ടാന്‍ ഇടം കൈയന്‍ സ്പിന്നര്‍ സോനം യെഷി. അന്താരാഷ്ട്ര ടി20 മത്സരത്തില്‍ 8 വിക്കറ്റുകള്‍ വീഴ്ത്തുന്ന ആദ്യ ബൗളറെന്ന റെക്കോര്‍ഡ് താരം സ്വന്തമാക്കി. മ്യാന്‍മറിനെതിരായ പോരാട്ടത്തിലാണ് താരത്തിന്റെ അമ്പരപ്പിക്കുന്ന ബൗളിങ്. ടി20 ഫോര്‍മാറ്റില്‍ ഒരു താരം 8 വിക്കറ്റുകള്‍ വീഴ്ത്തുന്നതും ഇതാദ്യമാണ്.

ഇടംകൈയന്‍ സ്പിന്നറായ സോനം 4 ഓവറില്‍ 7 റണ്‍സ് മാത്രം വഴങ്ങിയാണ് 8 വിക്കറ്റുകള്‍ പിഴുതത്. അന്താരാഷ്ട്ര ടി20യിലെ ഏറ്റവും മികച്ച ബൗളിങിന്റെ റെക്കോര്‍ഡ് 22കാരന്‍ കറക്കിയെടുത്തു.

മത്സരത്തില്‍ ആദ്യം ബാറ്റ് ചെയ്ത ഭൂട്ടാന്‍ നിശ്ചിത ഓവറില്‍ 9 വിക്കറ്റ് നഷ്ടത്തില്‍ 127 റണ്‍സാണ് സ്വന്തമാക്കിയത്. മ്യാന്‍മറിന്റെ പോരാട്ടം സോനമിന്റെ ബൗളിങില്‍ അതിവേഗമാണ് തീര്‍ന്നത്. വെറും 45 റണ്‍സില്‍ എല്ലാവരും പുറത്തായി. ഭൂട്ടാന് 82 റണ്‍സിന്റെ കൂറ്റന്‍ ജയം.

മലേഷ്യയുടെ സ്യസ്രുല്‍ ഇദ്രുസ് ചൈനയ്‌ക്കെതിരെ 8 റണ്‍സ് വഴങ്ങി 7 വിക്കറ്റെടുത്തതായിരുന്നു നേരത്തെയുള്ള റെക്കോര്‍ഡ്. 2023ലാണ് ഈ റെക്കോര്‍ഡിന്റെ പിറവി. ഈ വര്‍ഷം ബഹ്‌റൈന്‍ താരം അലി ദാവൂദും 7 വിക്കറ്റുകള്‍ വീഴ്ത്തിയിട്ടുണ്ട്. താരം 19 റണ്‍സ് വഴങ്ങിയിരുന്നു. ഭൂട്ടാനെതിരെയായിരുന്നു ഈ പ്രകടനം.

ടി20 ഫോര്‍മാറ്റില്‍ 2019ലാണ് ആദ്യമായി ഒരു താരം 7 വിക്കറ്റുകള്‍ വീഴ്ത്തിയത്. ലെസ്റ്റര്‍ഷെയര്‍ താരം കോളിന്‍ അക്കര്‍മാന്‍ ബിര്‍മിങ്ഹാം ബിയേഴ്‌സിനെതിരെ 18 റണ്‍സ് വഴങ്ങി 7 വിക്കറ്റുകള്‍ വീഴ്ത്തിയിരുന്നു. 2025ല്‍ ദര്‍ബാര്‍ രാജ്‌സഹി താരം ടസ്‌കിന്‍ അഹമദ് ധാക്ക ക്യാപിറ്റല്‍സിനെതിരെ 19 റണ്‍സ് വഴങ്ങി 7 വിക്കറ്റ് നേടിയതും ശ്രദ്ധേയമായിരുന്നു.

വനിതാ ക്രിക്കറ്റില്‍ നിലവിലെ റെക്കോര്‍ഡ് ഇന്തോനേഷ്യയുടെ റോമാലിയയുടെ പേരിലാണ്. താരം റണ്ണൊന്നും വഴങ്ങാതെ 7 വിക്കറ്റെടുത്ത് ചരിത്രമെഴുതിയിരുന്നു. വനിതാ ടി20 ഫോര്‍മാറ്റിലെ തന്നെ മിന്നും ബൗളിങ് ഇതാണ്. മംഗോളിയക്കെതിരെയായിരുന്നു താരത്തിന്റെ മാസ്മരിക ബൗളിങ്.