ധോനിയെ ഞാനും മിസ് ചെയ്യുന്നു, വൈറലായി കോഹ്‌ലിയുടെ പ്രതികരണം

സിഡ്‌നി: ഓസ്‌ട്രേലിയക്കെതിരെ രണ്ടാം ടി20ക്ക് ഇറങ്ങിയപ്പോഴും ധോനിയെ കുറിച്ച് ഓര്‍മപ്പെടുത്താനായിരുന്നു ഗ്യാലറിയില്‍ ആരാധകരില്‍ ചിലര്‍ ശ്രമിച്ചത്. വി മിസ് യു ധോനി എന്നെഴുതിയ ബാനര്‍ അവര്‍ ഉയര്‍ത്തി കാണിച്ചു. അതിന് ബൗണ്ടറി ലൈനിന് സമീപം ഫീല്‍ഡ് ചെയ്യാന്‍ എത്തിയപ്പോള്‍ കോഹ് ലി നല്‍കിയ മറുപടിയാണ് ഇപ്പോള്‍ വൈറലാവുന്നത്. 

ഞാനും മിസ് ചെയ്യുന്നു എന്നാണ് ആരാധകര്‍ക്ക് നേരെ നടന്നു കൊണ്ട് കോഹ് ലി പറഞ്ഞത്. ഇതിന്റെ വീഡിയോ സമൂഹമാധ്യമങ്ങളില്‍ വ്യാപകമായി പ്രചരിക്കുന്നു. ഓസ്‌ട്രേലിയക്കെതിരായ ഏകദിന പരമ്പരയില്‍ ഇന്ത്യ തോല്‍വിയിലേക്ക് വീണപ്പോഴും ധോനിയുടെ അസാന്നിധ്യം ആരാധകര്‍ ഓര്‍മിപ്പിച്ചിരുന്നു. 

2018-19 പര്യടനത്തില്‍ ഏകദിനത്തില്‍ ഓസ്‌ട്രേലിയക്കെതിരെ ഇന്ത്യ തകര്‍ച്ച മുന്‍പില്‍ കണ്ടപ്പോള്‍ തുടരെ താങ്ങി നിര്‍ത്തിയത് ധോനിയായിരുന്നു. 2004 മുതല്‍ 2020 വരെ നീണ്ട കരിയറില്‍ 17,266 റണ്‍സ് ആണ് ധോനി രാജ്യാന്തര ക്രിക്കറ്റില്‍ വാങ്ങി കൂട്ടിയത്. 108 അര്‍ധ ശതകവും, 16 സെഞ്ചുറിയും ഇതില്‍ ഉള്‍പ്പെടുന്നു.