സിഡ്നി: ഓസ്ട്രേലിയയിലെ ആഭ്യന്തര പോരാട്ടമായ വൺ ഡേ കപ്പ് പോരിൽ റെക്കോർഡ് അർധ ശതകവുമായി ഓസീസ് ഓപ്പണർ ജാക്ക് ഫ്രേസർ മക്​ഗുർക്. ക്വീൻസ്‍ലൻഡിനെതിരായ പോരാട്ടത്തിൽ സൗത്ത് ഓസ്ട്രേലിയക്കായി താരം വെറും 14 പന്തിൽ അർധ സെഞ്ച്വറി നേടി. ടൂർണമെന്റിന്റെ ചരിത്രത്തിലെ ഏറ്റവും വേ​ഗമേറിയ അർധ സെഞ്ച്വറിയാണിത്. സ്വന്തം റെക്കോർഡ് തന്നെയാണ് മക്​ഗുർക് തിരുത്തിയത്.

14 പന്തിൽ 50 അടിച്ച മക്​ഗുർക് 9 സിക്സും 10 ഫോറും സഹിതം 63 പന്തിൽ 122 റൺസ് അടിച്ചുകൂട്ടിയാണ് ക്രീസ് വിട്ടത്. 24കാരനായ താരത്തിന്റെ കരുത്തിൽ സൗത്ത് ഓസ്ട്രേലിയ നിശ്ചിത 50 ഓവറിൽ 7 വിക്കറ്റ് നഷ്ടത്തിൽ 397 റൺസ് അടിച്ചെടുത്തു. മത്സരത്തിൽ സൗത്ത് ഓസ്ട്രേലിയ ക്യാപ്റ്റൻ നഥാൻ മക്സ്വീനിയും കിടിലൻ സെഞ്ച്വറി തൂക്കി മക്​ഗുർകിനു ഉറച്ച പിന്തുണ നൽകി. താരം 103 പന്തിൽ 106 റൺസെടുത്തു.

ലിസ്റ്റ് എ ക്രിക്കറ്റിലെ ഏറ്റവും വേ​ഗമേറിയ അർധ സെഞ്ച്വറി റെക്കോർഡിന്റെ മൊത്തം പട്ടികയിൽ നാലാമതായി മക്​ഗുർ​കിന്റെ പ്രകടനം മാറി. വെറും 11 പന്തിൽ 50 അടിച്ച ഇന്ത്യയുടെ വണ്ടർ കിഡ് വൈഭവ് സൂര്യവംശിയാണ് ഈ റെക്കോർഡ് പട്ടികയിലെ ഒന്നാമൻ.

മത്സരത്തിന്റെ തുടക്കം മുതൽ തന്നെ മക്​ഗുർക് വൻ ആക്രമണമാണ് അഴിച്ചുവിട്ടത്. ടോം സ്ട്രാക്കറുടെ രണ്ടാം ഓവറിൽ 22 റൺസ് അടിച്ചെടുത്ത മക്​ഗുർ​ക് നാലാം ഓവറിൽ ടോം വിറ്റ്നിക്കെതിരെ 2 സിക്സും ഒരു ഫോറും തൂക്കി. ആറാം ഓവർ എറിഞ്ഞ ഹെയ്ഡൻ കെറിനെതിരെ ബൗണ്ടറി അടിച്ചാണ് മക്​ഗുർക് 14 പന്തിൽ 50ൽ എത്തിയത്. 22 പന്തിൽ 75 റൺസടിച്ച് മക്​ഗുർക് 49 പന്തിലാണ് സെഞ്ച്വറി നേടിയത്. ഒടുവിൽ 21ാം ഓവറിൽ‌ ഹെയ്ഡൻ കെറിൻെ പന്തിൽ പുറത്താകുമ്പോൾ 63 പന്തിൽ 122 റൺസിൽ മക്​ഗുർക് എത്തിയിരുന്നു.