ഫ്രീ വൈ - ഫൈയ്ക്ക് പിന്നിൽ ഹാക്കർമാരുണ്ടോ?, ഇക്കാര്യങ്ങൾ ശ്രദ്ധിക്കണേ

ഹോട്ടലിലോ, റെയിൽവേ സ്റ്റേഷനിലോ ഇരിക്കുമ്പോൾ സൗജന്യമായി വൈ-ഫൈ കിട്ടിയാൽ നമ്മൾ എന്ത് ചെയ്യും? തീർച്ചയായും നമ്മൾ അത് കണക്ട് ചെയ്യും. ഇങ്ങനെ ലഭിക്കുന്ന പബ്ലിക് വൈ-ഫൈ ഉപയോഗിക്കുന്നത് ശരിക്കും സേഫ് ആണോ? സംഭവം അത്ര സേഫ് അല്ല. പബ്ലിക് വൈ-ഫൈയുടെ പ്രധാന പ്രശ്നം, നമ്മൾ ഉപയോഗിക്കുന്ന അതേ നെറ്റ് വർക്ക് വേറെ ആരൊക്കെ ഉപയോഗിക്കുന്നുണ്ട് എന്ന് അറിയാൻ കഴിയില്ല എന്നതാണ്.

ഉദാഹരണത്തിന്, ഒരു കോഫി ഷോപ്പിൽ ഫ്രീ വൈ-ഫൈ എന്ന പേരിൽ ഒരു നെറ്റ്‌വർക്ക് കാണുന്നു. നമ്മൾ അതിലേക്ക് ഫോണോ,ലാപ്ടോപ്പോ കണക്ട് ചെയ്തു.

പക്ഷേ, അത് ശരിക്കും കോഫി ഷോപ് ഉടമ നൽകുന്ന വൈ-ഫൈ ആണോ എന്ന് എങ്ങനെ ഉറപ്പിക്കാൻ കഴിയും? ചിലപ്പോൾ ഹാക്കർമാർ ആളുകളെ കുടുക്കാൻ യഥാർത്ഥ നെറ്റ്‌വർക്കിന്റെ പേരിൽ ഫേക്ക് വൈ-ഫൈ നെറ്റ്‌വർക്ക് ഉണ്ടാക്കാം. നമ്മൾ അതിലേക്ക് കണക്ട് ചെയ്താൽ, നമ്മൾ സന്ദർശിക്കുന്ന വെബ്സൈറ്റുകൾ, വ്യക്തിഗത വിവരങ്ങൾ തുടങ്ങിയവയെല്ലാം ഹാക്ക് ചെയ്യുവാൻ സാധ്യത ഏറെയാണ്.

പക്ഷെ, പബ്ലിക് വൈ-ഫൈയിൽ കണക്ട് ചെയ്തതുകൊണ്ട് മാത്രം നിങ്ങളുടെ ഫോൺ ഉടൻ ഹാക്ക് ആകില്ല. ഇന്നത്തെ മിക്ക വെബ്സൈറ്റും ഉപഭോക്താവിന്റെ സ്വകാര്യാത സംരക്ഷിക്കാൻ വേണ്ട ക്രമീകരങ്ങൾ ചെയ്തിട്ടുണ്ടാകും. എന്നാലും നമ്മൾ ചില കാര്യങ്ങൾ ശ്രദ്ധിക്കണം.

ഒന്ന് - നെറ്റ്‌വർക്കിന്റെ പേര് ശരിയാണെന്ന് അധികൃതരോട് ചോദിച്ച് ഉറപ്പാക്കുക.

രണ്ട് - പബ്ലിക് വൈ-ഫൈ ഉപയോഗിക്കുമ്പോൾ ഓൺലൈൻ ബാങ്കിങ് പോലുള്ള കാര്യങ്ങൾ ചെയ്യുന്നത് ഒഴിവാക്കുക.

മൂന്ന് - നിങ്ങളുടെ ഫോണിൽ ഓട്ടോമാറ്റിക് വൈ-ഫൈ കണക്ഷൻ ഓഫ് ചെയ്യുക. ആവശ്യമില്ലെങ്കിൽ ഫയൽ ഷെറിങ്, എയർ ഡ്രോപ് പോലുള്ളവ ഓഫ് ചെയ്തിടുക

നാല് - പബ്ലിക് വൈ-ഫൈഉപയോഗിച്ച് വെബ്സൈറ്റ് തുറക്കുമ്പോൾ HTTPS ഉണ്ടോ എന്ന് മാത്രം നോക്കരുത്. അഡ്രസ് ബാറിൽ കാണുന്ന വെബ്സൈറ്റ് നെയിം അഥവാ ഡൊമൈൻ നെയിം ശരിയാണോ എന്നും പരിശോധിക്കണം.

അപ്പോൾ അടുത്ത തവണ പബ്ലിക് വൈഫൈ കണക്ട് ചെയ്യുമ്പോൾ ഇക്കാര്യങ്ങൾ ശ്രദ്ധിക്കണെ.