ടിവിഎസ് റോനിന്‍ പുതിയ പതിപ്പ് അവതരിപ്പിച്ചു; വിലയും ഫീച്ചറുകളും അറിയാം

ടിവിഎസ് റോനിന്‍-ന്റെ ഏറ്റവും പുതിയ പതിപ്പ് അവതരിപ്പിച്ചു. നിലവിലുള്ളവയില്‍ അധിക ഫീച്ചറുകള്‍ ഉള്‍പ്പെടുത്തിയാണ് അപ്‌ഡേറ്റഡ് പതിപ്പ് അവതരിപ്പിച്ചിരിക്കുന്നത്. 1.42 ലക്ഷം രൂപ (എക്‌സ്-ഷോറൂം, ഡല്‍ഹി) വിലയുള്ള 'ബേസ്+' വകഭേദത്തിന് ഡ്യുവല്‍-ചാനല്‍ എബിഎസ് സ്റ്റാന്‍ഡേര്‍ഡ് ആയി നല്‍കിയിരിക്കുന്നു. 'സണ്‍ലൈറ്റ് യെല്ലോ', 'ഡെസേര്‍ട്ട് മിറാഷ്' എന്നിങ്ങനെ രണ്ട് കളര്‍ ഓപ്ഷനുകളിലും ലഭ്യമാണ്.

സണ്‍ലൈറ്റ് യെല്ലോ പതിപ്പില്‍ ഫ്യുവല്‍ ടാങ്കില്‍ പൂര്‍ണ്ണമായും മഞ്ഞ നിറവും, അതില്‍ കറുപ്പ് മെറ്റാലിക് ഫിനിഷിലുള്ള ടിവിഎസ് ലോഗോയും താഴത്തെ ഭാഗത്തായി 'റോനിന്‍' ഗ്രാഫിക്‌സും നല്‍കിയിരിക്കുന്നു. ഡെസേര്‍ട്ട് മിറാഷ് പതിപ്പിലും സമാനമായ ശൈലിയാണുള്ളതെങ്കിലും ടാങ്കിന് ബ്രൗണ്‍ നിറമാണ് നല്‍കിയിരിക്കുന്നത്.

ഡല്‍ഹിയില്‍ 1.51 ലക്ഷം രൂപ എക്‌സ്-ഷോറൂം വിലയുള്ള 'മിഡ്' വകഭേദത്തില്‍ ഇപ്പോള്‍ ടേണ്‍-ബൈ-ടേണ്‍ നാവിഗേഷനായി ബ്ലൂടൂത്ത് കണക്റ്റിവിറ്റി ലഭ്യമാണ്. കൂടാതെ, യാത്രയ്ക്കിടയില്‍ ഫോണ്‍ ചാര്‍ജ് ചെയ്യുന്നത് എളുപ്പമാക്കുന്നതിനായി ഒരു ടൈപ്പ്-സി ചാര്‍ജറും നല്‍കിയിട്ടുണ്ട്. 'ടോപ്പ്' വകഭേദത്തിലും ശ്രദ്ധേയമായ മാറ്റങ്ങള്‍ വരുത്തിയിട്ടുണ്ട്. ഇതില്‍ ഇപ്പോള്‍ ട്രാക്ഷന്‍ കണ്‍ട്രോള്‍ സിസ്റ്റം സ്റ്റാന്‍ഡേര്‍ഡ് ആയി ലഭിക്കുന്നു. മിഡ് വകഭേദത്തെപ്പോലെ തന്നെ, ടോപ്പ് വകഭേദത്തിലും ടൈപ്പ്-സി ചാര്‍ജര്‍ ഉള്‍പ്പെടുത്തിയിട്ടുണ്ട്. സീറ്റിലും മാറ്റങ്ങള്‍ വരുത്തിയിട്ടുണ്ട്; കൂടുതല്‍ സുഖപ്രദമായ യാത്ര ഉറപ്പാക്കുന്ന പ്രീമിയം സീറ്റാണ് ഇതില്‍ നല്‍കിയിരിക്കുന്നത്. എന്നിരുന്നാലും, വിശദമായ റോഡ് ടെസ്റ്റിന് ശേഷമേ ഇതിനെക്കുറിച്ച് കൃത്യമായ അഭിപ്രായം പറയാനാകൂ. ടോപ്പ് വകഭേദത്തിന് 1.63 ലക്ഷം രൂപയാണ് (എക്‌സ്-ഷോറൂം, ഡല്‍ഹി) വില. പുതിയ ഫീച്ചറുകള്‍ കൂട്ടിച്ചേര്‍ത്തതൊഴിച്ചാല്‍, ബൈക്കിന്റെ മെക്കാനിക്കല്‍ വശങ്ങളില്‍ മാറ്റമൊന്നുമില്ല. 20.1 ബിഎച്ച്പി കരുത്തും 19.93എന്‍എം ടോര്‍ക്കും നല്‍കുന്ന അതേ 225സിസി, എയര്‍/ഓയില്‍-കൂള്‍ഡ്, സിംഗിള്‍-സിലിണ്ടര്‍ എന്‍ജിന്‍ തന്നെയാണ് ഇതിലും ഉപയോഗിച്ചിരിക്കുന്നത്.