ഫോണ്‍ നഷ്ടപ്പെട്ടാല്‍ റിമോട്ട് ഉപയോഗിച്ച് ലോക്ക് ചെയ്യാം, എഐ ടൂളുകള്‍; ഓപ്പോ എഫ്33 സീരീസ് വിപണിയില്‍

മുംബൈ: പ്രമുഖ സ്മാര്‍ട്ട്‌ഫോണ്‍ നിര്‍മ്മാതാക്കളായ ഓപ്പോ, തങ്ങളുടെ മിഡ് റേഞ്ച് സ്മാര്‍ട്ട്‌ഫോണ്‍ വിപണി പുതുക്കി എഫ്33 സീരീസ് ഇന്ത്യന്‍ വിപണിയില്‍ അവതരിപ്പിച്ചു. കളര്‍ ഒഎസ് 16ല്‍ അധിഷ്ഠിതമായ സോഫ്റ്റ്വെയര്‍ അപ്ഗ്രേഡുകളിലൂടെ മിഡ്-റേഞ്ച് വിഭാഗത്തില്‍ മികച്ച മാറ്റങ്ങളാണ് കമ്പനി ലക്ഷ്യമിടുന്നത്.

ചൂടാകുന്നത് ഒഴിവാക്കാന്‍ 4289mm² വേപ്പര്‍ ചേംബര്‍ കൂളിങ് സിസ്റ്റം ഉള്‍പ്പെടുത്തിയിട്ടുണ്ട്. കഠിനമായ കാലാവസ്ഥയിലും സ്ഥിരതയാര്‍ന്ന പ്രകടനം കാഴ്ചവെക്കാന്‍ ഇത് സഹായിക്കുമെന്ന് കമ്പനി അവകാശപ്പെടുന്നു. ഉയര്‍ന്ന പെര്‍ഫോമന്‍സിനേക്കാള്‍ ഉപരിയായി, ദീര്‍ഘനേരം തടസ്സമില്ലാതെ പ്രവര്‍ത്തിക്കാന്‍ പുതിയ സീരീസിന് കഴിയുമെന്നും കമ്പനി അവകാശപ്പെടുന്നു.

ഫോണിന്റെ വേഗം വര്‍ദ്ധിപ്പിക്കുന്നതിനും ആപ്പുകളുടെ പ്രതികരണം മെച്ചപ്പെടുത്തുന്നതിനുമായി ട്രിനിറ്റി എന്‍ജിന്‍ , ലുമിനസ് റെന്‍ഡറിംഗ് എന്‍ജിന്‍ എന്നി പേരുകളില്‍ ഡ്യുവല്‍ എന്‍ജിന്‍ സ്മൂത്ത്‌നെസ് സിസ്റ്റം ഇതില്‍ ക്രമീകരിച്ചിട്ടുണ്ട്. ഏകദേശം 6 വര്‍ഷത്തോളം ഫോണിന്റെ പ്രവര്‍ത്തനം ഒരേ വേഗത്തില്‍ നിലനിര്‍ത്താന്‍ സഹായിക്കുന്ന ഫ്‌ലൂവന്‍സി പ്രൊട്ടക്ഷന്‍ ആണ് മറ്റൊന്ന്. ഫോണ്‍ നഷ്ടപ്പെട്ടാല്‍ കസ്റ്റമര്‍ സപ്പോര്‍ട്ട് വഴി റിമോട്ട് ഉപയോഗിച്ച് ലോക്ക് ചെയ്യാന്‍ സഹായിക്കുന്ന ഫീച്ചര്‍ ആണ് മറ്റൊരു സവിശേഷത. എഴുതുന്നതിനും ഡോക്യുമെന്റ് സ്‌കാനിങ്ങിനും ഫോട്ടോ എഡിറ്റിങ്ങിനും ആവശ്യമായ എഐ സൗകര്യങ്ങള്‍ ഇതിലുണ്ട്.