വിഷാദ രോഗികള്‍ എയ്‌റോബിക് വ്യായാമങ്ങള്‍ ശീലമാക്കിയാല്‍ വലിയ മാറ്റങ്ങള്‍ കാണാന്‍ സാധിക്കുമെന്ന് പഠനം. മാനസികാരോഗ്യത്തില്‍ല്‍ എയ്‌റോബിക് വ്യായാമങ്ങള്‍ വലിയ പങ്കു വഹിക്കുന്നവയാണെന്നും വിഷാദം പോലുള്ള അവസ്ഥകള്‍ ചികിത്സിക്കുമ്പോള്‍ ഇത്തരം വ്യായാമ രീതികള്‍ ഏറ്റവും ഫലപ്രദമായി കണ്ടുവരുന്നെന്നും ഗവേഷകര്‍ പറയുന്നു. 18നും 65നും ഇടയില്‍ പ്രായമുള്ള 455 ആളുകളില്‍ നടത്തിയ പഠനത്തില്‍ നിന്നാണ് ഈ കണ്ടെത്തലിലേക്ക് എത്തിയത്. 

വിഷാദ രോഗത്തിന് അടിമയായിട്ടുള്ള ആളുകളെയാണ് പഠനത്തിനായി തിരഞ്ഞെടുത്തത്. പത്ത് ആഴ്ചകളോളം എയ്‌റോബിക് വ്യായാമം ശീലമാക്കിയതിന് ശേഷം ഇവരിലെ മാറ്റങ്ങള്‍ വീക്ഷിക്കുകയായിരുന്നു ഗവേഷകര്‍. ആഴ്ചയില്‍ മൂന്ന് ദിവസമാണ് വ്യായാമത്തില്‍ ഏര്‍പ്പെട്ടത്. ദിവസവും ശരാശരി 45മിനിറ്റാണ് വ്യായാമത്തിനായി ഉപയോഗിച്ചിരുന്നത്. ഡിപ്രെഷണ്‍ ആന്‍ഡ് ആന്‍സൈറ്റി എന്ന ജേര്‍ണലില്‍ പ്രസിദ്ധീകരിച്ച പഠനമാണ് ഇതേക്കുറിച്ച് വിവരിക്കുന്നത്.