ഉച്ചയ്ക്ക് ചോറ് കഴിച്ചാൽ ഉറക്കം വരുമോ? ഭക്ഷണശീലങ്ങളിൽ വരുത്തേണ്ട മാറ്റങ്ങൾ

ഉച്ച ഊണിന് ശേഷം കണ്ണുകൾ അടഞ്ഞുപോകുന്നതായി തോന്നാറുണ്ടോ? ജോലി ചെയ്യുമ്പോഴും കമ്പ്യൂട്ടറിന് മുന്നിൽ ഇരിക്കുമ്പോഴും ഉറക്കം നിയന്ത്രിക്കാൻ കഴിയാതെ വരുറുണ്ടോ? പലരും നേരിടുന്ന ഒരു സാധാരണ പ്രശ്നമാണിത്. ഭക്ഷണരീതി മുതൽ രാത്രിയിലെ ഉറക്കക്കുറവു വരെ ഇതിന് കാരണമാകാം. എന്നാൽ എല്ലാ ദിവസവും അമിതമായ ഉറക്കം അനുഭവപ്പെടുന്നുണ്ടെങ്കിൽ അത് നിസ്സാരമായി കാണരുത് താനും.

എന്തുകൊണ്ടാണ് ഭക്ഷണം കഴിച്ചു കഴിഞ്ഞാൽ ഉറക്കം വരുന്നത്?

ഉച്ചഭക്ഷണത്തിനു ശേഷം അനുഭവപ്പെടുന്ന മയക്കത്തെ Postprandial somnolence എന്നാണ് വിളിക്കുന്നത്. ഭക്ഷണം കഴിച്ചതിനു ശേഷം ശരീരത്തിൽ സംഭവിക്കുന്ന മാറ്റങ്ങൾ, ശരീരത്തിന്റെ സ്വാഭാവിക ജൈവഘടികാരം, ഉറക്കത്തിന്റെ ഗുണനിലവാരം എന്നിവയെല്ലാം ഇതിൽ പങ്കുവഹിക്കാം.

ചോറ് കൂടുതലായി കഴിക്കുന്നതാണോ കാരണം?

ഉച്ചഭക്ഷണത്തിന് മലയാളികൾ പൊതുവെ തിരഞ്ഞെടുക്കുന്നത് ചോറാണ്. എന്നാൽ ഒരേസമയം വലിയ അളവിൽ ചോറ് കഴിക്കുകയും പച്ചക്കറികൾ, പ്രോട്ടീൻ അടങ്ങിയ ഭക്ഷണങ്ങൾ എന്നിവ കുറവായി ഉൾപ്പെടുത്തുകയും ചെയ്യുമ്പോൾ ഭക്ഷണത്തിന് ശേഷം ക്ഷീണം അനുഭവപ്പെടാം. കാർബോഹൈഡ്രേറ്റ് കൂടുതലുള്ള ഭക്ഷണം രക്തത്തിലെ ഗ്ലൂക്കോസ് നിലയെ സ്വാധീനിക്കും.

ഭക്ഷണത്തിൻ്റെ അളവ്, അതിലെ പോഷകഘടകങ്ങൾ, വ്യക്തിയുടെ ആരോഗ്യസ്ഥിതി എന്നിവയെ ആശ്രയിച്ച് ഇതിന്റെ ഫലവും വ്യത്യാസപ്പെടാം. അതിനായി ചോറ് പൂർണമായി ഒഴിവാക്കേണ്ടതില്ല. പകരം, ആവശ്യത്തിന് ചോറിനൊപ്പം പച്ചക്കറികൾ, പയർവർഗങ്ങൾ, മീൻ, മുട്ട തുടങ്ങിയ പ്രോട്ടീൻ അടങ്ങിയ ഭക്ഷണങ്ങളും ഉൾപ്പെടുത്താം.

രാത്രിയിൽ ഉറക്കം ശരിയായ രീതിയിൽ ലഭിക്കുന്നില്ലേ?

ഉച്ചയ്ക്ക് ഉറക്കം വരാനുള്ള മറ്റൊരു കാരണം രാത്രിയിലെ ഉറക്കക്കുറവാണ്. വൈകി ഉറങ്ങുക, രാത്രിയിൽ പലതവണ ഉണരുക, ഉറക്കത്തിന്റെ ഗുണനിലവാരം കുറയുക തുടങ്ങിയവ പകൽ സമയത്ത് ക്ഷീണത്തിനും മയക്കത്തിനും കാരണമാകാം. പ്രത്യേകിച്ച് മൊബൈൽ ഫോൺ ഉപയോഗം കാരണം ഉറങ്ങാൻ വൈകുന്നവരിലും ജോലി സമ്മർദം മൂലം മതിയായ ഉറക്കം ലഭിക്കാത്തവരിലും ഇത് കൂടുതലായി കണ്ടേക്കാം.

ശരീരത്തിൻ്റെ സ്വാഭാവിക ജൈവഘടികാരവും കാരണമാകാം

ഉച്ചഭക്ഷണം കഴിച്ചതു കൊണ്ടു മാത്രമല്ല ചിലർക്ക് ഉറക്കം വരുന്നത്. ശരീരത്തിൻ്റെ സ്വാഭാവിക ജൈവഘടികാരം അനുസരിച്ച് ഉച്ചയ്ക്കു ശേഷം ചില സമയങ്ങളിൽ ജാഗ്രത കുറയുകയും മയക്കം അനുഭവപ്പെടുകയും ചെയ്യാം. രാത്രിയിൽ നന്നായി ഉറങ്ങിയവർക്ക് പോലും ഉച്ചയ്ക്കു ശേഷം നേരിയ ക്ഷീണം തോന്നുന്നത് സ്വാഭാവികമാണ്. എന്നാൽ ഈ മയക്കം വളരെ ശക്തമാണെങ്കിൽ മറ്റ് കാരണങ്ങളും പരിശോധിക്കേണ്ടതുണ്ട്.

മധുരവും കൊഴുപ്പ് കൂടുതലുള്ള ഭക്ഷണങ്ങളും

ഉച്ചഭക്ഷണത്തിന് ശേഷം മധുരപലഹാരങ്ങൾ, മധുരം ചേർത്ത പാനീയങ്ങൾ, കൊഴുപ്പ് കൂടുതലുള്ള ഭക്ഷണങ്ങൾ എന്നിവ പതിവായി കഴിക്കുന്നവരിൽ ഭക്ഷണശേഷമുള്ള ഊർജത്തിലും ജാഗ്രതയിലും വ്യത്യാസങ്ങൾ അനുഭവപ്പെടാം. എന്നാൽ മധുരം കഴിക്കുന്നതു കൊണ്ട് മാത്രം ഉറക്കം വരണമെന്നില്ല. ഭക്ഷണത്തിന്റെ അളവ്, ശരീരത്തിലെ ഗ്ലൂക്കോസ് നിയന്ത്രണം, വ്യക്തിയുടെ ജീവിതശൈലി എന്നിവയും ഇതിൽ പ്രധാനമാണ്.

പ്രമേഹമോ മറ്റ് ആരോഗ്യപ്രശ്നങ്ങളോ ഉണ്ടോ?

ഉച്ചഭക്ഷണത്തിന് ശേഷം ഇടയ്ക്കിടെ ഉറക്കം വരുന്നത് മാത്രം പ്രമേഹത്തിൻ്റെ ലക്ഷണമാണെന്ന് പറയാനാവില്ല. എന്നാൽ അമിതമായ ദാഹം, ഇടയ്ക്കിടെ മൂത്രമൊഴിക്കൽ, കാഴ്ച മങ്ങൽ, വിശദീകരിക്കാനാകാത്ത ക്ഷീണം തുടങ്ങിയ ലക്ഷണങ്ങൾക്കൊപ്പം ഇത് അനുഭവപ്പെടുന്നുണ്ടെങ്കിൽ രക്തത്തിലെ ഗ്ലൂക്കോസ് നില പരിശോധിക്കാൻ ഡോക്ടറുടെ നിർദേശം തേടാം.

അതുപോലെ, ഉറക്കത്തിനിടെ ശക്തമായ കൂർക്കംവലി, ശ്വാസം മുട്ടുന്നതുപോലുള്ള ഇടവേളകൾ, പകൽ അമിതമായ ഉറക്കം എന്നിവ ഉണ്ടെങ്കിൽ സ്ലീപ് അപ്നിയ പോലുള്ള ഉറക്കസംബന്ധമായ പ്രശ്നങ്ങളും പരിഗണിക്കേണ്ടതുണ്ട്. ചില മരുന്നുകളും തൈറോയ്ഡ് സംബന്ധമായ പ്രശ്നങ്ങളും മറ്റ് ആരോഗ്യാവസ്ഥകളും ക്ഷീണത്തിന് കാരണമാകാം.

ഉച്ചഭക്ഷണത്തിന് ശേഷമുള്ള ഉറക്കം കുറയ്ക്കാം

സമീകൃതമായ ഭക്ഷണം കഴിക്കുക

ചോറ്, പച്ചക്കറികൾ, പയർവർഗങ്ങൾ, മുട്ട, മീൻ തുടങ്ങിയവ ആവശ്യത്തിന് ഉൾപ്പെടുത്തുക. അമിതമായി ഭക്ഷണം കഴിക്കുന്ന ശീലം ഒഴിവാക്കുക.

ഭക്ഷണശേഷം അൽപനേരം നടക്കുക

ഭക്ഷണം കഴിച്ചുകഴിഞ്ഞ് 10–15 മിനിറ്റ് സാവധാനം നടക്കുന്നത് ഭക്ഷണശേഷമുള്ള രക്തത്തിലെ ഗ്ലൂക്കോസ് നിയന്ത്രണത്തിന് സഹായിക്കാം. ശരീരത്തിന് അനുയോജ്യമായ വേഗത്തിൽ നടക്കുക.

ആവശ്യത്തിന് വെള്ളം കുടിക്കുക

നിർജലീകരണം ക്ഷീണത്തിന് കാരണമാകാം. ദാഹം തോന്നുമ്പോൾ വെള്ളം കുടിക്കുകയും ദിവസം മുഴുവൻ ആവശ്യത്തിന് ജലാംശം ഉറപ്പാക്കുകയും ചെയ്യുക.

ഉറക്കസമയം ക്രമീകരിക്കുക

ദിവസവും ഒരേ സമയത്ത് ഉറങ്ങാനും ഉണരാനും ശ്രമിക്കുക. ഉറങ്ങുന്നതിന് മുമ്പുള്ള മൊബൈൽ ഫോൺ ഉപയോഗവും വൈകിയുള്ള കഫീൻ ഉപയോഗവും നിയന്ത്രിക്കുക.

ഭക്ഷണത്തിന്റെ അളവ് ശ്രദ്ധിക്കുക

വയറുനിറയെ ഒരേസമയം കഴിക്കുന്നതിനു പകരം ശരീരത്തിന് ആവശ്യമായ അളവിൽ ഭക്ഷണം കഴിക്കുക. ഭക്ഷണം വേഗത്തിൽ കഴിക്കുന്ന ശീലവും ഒഴിവാക്കുക.