കാസർകോടിന്റെ പ്രകൃതിഭംഗി തൊട്ടറിയാൻ 'പൊസഡി ഗുംപെ'; വിനോദസഞ്ചാര കേന്ദ്രമായി വികസിപ്പിക്കാൻ ഡിടിപിസി

കാസർകോട്: വടക്കൻ കേരളത്തിന്റെ മനോഹരമായ പ്രകൃതിഭംഗി ഒളിപ്പിച്ചുവെച്ചിരിക്കുന്ന പൈവളികെ പഞ്ചായത്തിലെ പൊസഡി ഗുംപെ മലനിരകളെ പ്രധാന വിനോദസഞ്ചാര കേന്ദ്രമായി വികസിപ്പിക്കാൻ ജില്ലാ ടൂറിസം പ്രമോഷൻ കൗൺസിൽനടപടികൾ തുടങ്ങി. കാസർകോട് നഗരത്തിൽ നിന്ന് ഏകദേശം 25 കിലോമീറ്റർ അകലെ സമുദ്രനിരപ്പിൽ നിന്ന് 1,060 അടി ഉയരത്തിൽ സ്ഥിതി ചെയ്യുന്ന ഈ പ്രദേശം ജില്ലയിലെ അധികമാരും അറിയപ്പെടാത്ത പ്രകൃതിരമണീയമായ ഇടങ്ങളിൽ ഒന്നാണ്.തുളു ഭാഷയിൽ 'പുതിയ കുന്ന്' എന്നർത്ഥം വരുന്ന പൊസഡി ഗുംപെയെ വിനോദസഞ്ചാരികൾക്കായി സജ്ജമാക്കുന്നതിന്റെ ഭാഗമായി വിപുലമായ അടിസ്ഥാന സൗകര്യ വികസന പദ്ധതികളാണ് ജില്ലാ ഭരണകൂടം ആസൂത്രണം ചെയ്തിരിക്കുന്നത്.

1.1 കോടി രൂപയുടെ ഫെസിലിറ്റേഷൻ സെന്റർ

വിനോദസഞ്ചാരികളെ ആകർഷിക്കുന്നതിനായി കാസർകോട് വികസന പാക്കേജിൽ നിന്നുള്ള ഫണ്ട് ഉപയോഗിച്ച് 1.1 കോടി രൂപ ചെലവിൽ ഡിടിപിസി അത്യാധുനിക അമിനിറ്റി സെന്ററിന്റെ നിർമ്മാണം ആരംഭിച്ചു. ശുചിമുറികൾ, ശുദ്ധജല വിതരണ സംവിധാനം, വിശ്രമ മുറികൾ, താമസ സൗകര്യം എന്നിവ ഈ കേന്ദ്രത്തിൽ ഒരുക്കും. ഇതിനുപുറമെ, സന്ദർശകർക്കായി ചെറിയ ലഘുഭക്ഷണ ശാലകളും ഇവിടെ പ്രവർത്തനമാരംഭിക്കും. കേന്ദ്രത്തിന്റെ നിർമ്മാണം ഈ വർഷം അവസാനത്തോടെ പൂർത്തിയാക്കാനാണ് അധികൃതർ ലക്ഷ്യമിടുന്നത്.

സൂര്യാസ്തമയവും ഉദയവും കാണാൻ അനുയോജ്യമായ കേന്ദ്രം

ഒരു കിലോമീറ്ററോളം നീളുന്ന ട്രക്കിംഗ് പാതയിലൂടെ മുകളിലെത്തിയാൽ ഒരേസമയം പശ്ചിമഘട്ട മലനിരകളുടെ പച്ചപ്പും മറുഭാഗത്ത് അറബിക്കടലിന്റെ വിദൂര ദൃശ്യങ്ങളും ആസ്വദിക്കാൻ സാധിക്കുമെന്നതാണ് പൊസഡി ഗുംപെയുടെ പ്രധാന ആകർഷണം. മഴക്കാലത്ത് ട്രക്കിംഗ് പാതയോരത്ത് രൂപപ്പെടുന്ന കൊച്ചരുവികൾ ഇവിടുത്തെ പ്രകൃതിഭംഗി ഇരട്ടിയാക്കുന്നു.

പ്രദേശം സന്ദർശിച്ച ജില്ലാ കളക്ടർ അർജുൻ പാണ്ഡ്യൻ വികസന പ്രവർത്തനങ്ങൾ വിലയിരുത്തി. "ജില്ലയിലെ ഏറ്റവും മനോഹരമായ കാഴ്ചകളുള്ള ഒരിടമാണിത്. പ്രത്യേകിച്ച് സൂര്യോദയവും അസ്തമയവും കാണാൻ ഏറ്റവും അനുയോജ്യമായ കേന്ദ്രം. അമിനിറ്റി സെന്റർ ഈ വർഷം അവസാനത്തോടെ പൂർത്തിയാകും. മലമുകളിലേക്ക് എത്തുന്ന വിനോദസഞ്ചാരികൾക്ക് വിശ്രമിക്കാനും കാഴ്ചകൾ ആസ്വദിക്കാനുമായി സ്റ്റീൽ ബെഞ്ചുകൾ സ്ഥാപിക്കാനും പദ്ധതിയുണ്ട്," കളക്ടർ വ്യക്തമാക്കി.

പച്ചപ്പ് നിറഞ്ഞ കുന്നിൻനിരകൾ കൊണ്ട് അനുഗ്രഹീതമായ ഈ പ്രദേശം മഴക്കാല വിനോദസഞ്ചാരത്തിന് ഏറെ അനുയോജ്യമാണ്. വിനോദസഞ്ചാരികളുടെ വരവ് മുൻകൂട്ടിക്കണ്ട് പ്രദേശത്ത് സ്വകാര്യ സംരംഭകരും തദ്ദേശവാസികളും ഹോംസ്റ്റേകളും ചെറിയ ഹോട്ടലുകളും ആരംഭിക്കാനുള്ള ഒരുക്കങ്ങൾ ഇതിനകം തുടങ്ങിയിട്ടുണ്ട്. പദ്ധതി യാഥാർത്ഥ്യമാകുന്നതോടെ ജില്ലയുടെ ടൂറിസം ഭൂപടത്തിൽ പൊസഡി ഗുംപെ പ്രധാന അടയാളമായി മാറും.