പാലക്കാട്: നൊങ്ക് ശേഖരിക്കാൻ പനയിൽ കയറിയ വയോധികൻ പനയുടെ മുകളിൽ കുടുങ്ങി മരിച്ചു. പാലപ്പുറം പല്ലാർമംഗലം ചാത്തൻ പ്ലാക്കിൽ രാജൻ (64) ആണ് മരിച്ചത്. ഇന്ന് രാവിലെയാണ് സംഭവം നടന്നത്. നൊങ്ക് ശേഖരിക്കാൻ ഏകദേശം 60 അടി ഉയരമുള്ള പനയിലാണ് രാജൻ കയറിയത്. ഏറെനേരമായിട്ടും രാജനെ കാണാതായതോടെ പ്രദേശവാസികൾ അന്വേഷണം ആരംഭിച്ചു. തുടർന്നാണ് പനയുടെ മുകളിൽ കുടുങ്ങിയ നിലയിൽ രാജനെ കണ്ടെത്തിയത്.

ഉടൻ തന്നെ നാട്ടുകാർ ഷൊർണൂർ ഫയർഫോഴ്സിനെ വിവരം അറിയിക്കുകയായിരുന്നു. സ്ഥലത്തെത്തിയ ഫയർഫോഴ്സ് സംഘം ഏറെ സാഹസികമായി രക്ഷാപ്രവർത്തനം നടത്തി രാജനെ താഴെയിറക്കിയെങ്കിലും ജീവൻ രക്ഷിക്കാൻ ആയില്ല. മൃതശരീരം ഒറ്റപ്പാലം താലൂക്ക് ആശുപത്രി മോർച്ചറിയിലേക്ക് മാറ്റി. ഹൃദയാഘാതമാണ് മരണകാരണമെന്നാണ് പ്രാഥമിക നിഗമനം.