പൊന്നാനി എംഎൽഎയ്ക്ക് ഗുരുവായൂരിൽ എന്താണ് കാര്യം?'; കെ പി നൗഷാദ് അലിക്കെതിരെ കരിങ്കൊടി കാട്ടി സിപിഎം പ്രതിഷേധം

തൃശൂർ: ഗുരുവായൂർ നിയോജകമണ്ഡലത്തിൽ ഉൾപ്പെടുന്ന പുന്നയൂരിൽ സ്കൂൾ വിദ്യാർഥികൾക്കായുള്ള പ്രഭാതഭക്ഷണ പദ്ധതിയുടെ ഉദ്ഘാടനത്തിനെത്തിയ പൊന്നാനി എംഎൽഎ പി. നൗഷാദ് അലിക്കെതിരെ സിപിഎം പ്രവർത്തകർ കരിങ്കൊടി കാട്ടി പ്രതിഷേധിച്ചു. ചടങ്ങിൽ ഗുരുതരമായ പ്രോട്ടോകോൾ ലംഘനം നടന്നുവെന്ന് ആരോപിച്ചായിരുന്നു വ്യാഴാഴ്ച സിപിഎം പ്രവർത്തകർ കരിങ്കൊടിയുമായി രംഗത്തെത്തിയത്.

പുന്നയൂർ പഞ്ചായത്തിന്റെ ആഭിമുഖ്യത്തിൽ ആർപിഎംഎം യുപി സ്കൂളിൽ വിദ്യാർഥികൾക്കായി സംഘടിപ്പിച്ച 'നൂട്രി സ്റ്റാർട്ട്' പ്രഭാതഭക്ഷണ പദ്ധതിയുടെ ഉദ്ഘാടനം നിർവഹിക്കാനെത്തിയപ്പോഴാണ് എംഎൽഎയ്ക്ക് നേരെ പ്രതിഷേധമുണ്ടായത്. ഗുരുവായൂർ മണ്ഡലത്തിൽ ഉൾപ്പെടുന്ന സ്കൂളിലെ ഔദ്യോഗിക പരിപാടിയിൽ പൊന്നാനി എംഎൽഎ പങ്കെടുക്കുന്നതിനെ ചോദ്യം ചെയ്ത സിപിഎം പ്രവർത്തകർ, "ഗുരുവായൂരിൽ പൊന്നാനി എംഎൽഎയ്ക്ക് എന്താണ് കാര്യം?" എന്ന ചോദ്യമുയർത്തി എംഎൽഎയെ വഴിയിൽ തടയുകയായിരുന്നു.

ഗുരുവായൂർ മണ്ഡലത്തെ പ്രതിനിധീകരിക്കുന്ന പ്രാദേശിക എംഎൽഎയായ എൻ.കെ. അക്ബറെ ചടങ്ങിൽനിന്ന് മനഃപൂർവ്വം മാറ്റിനിർത്തി പകരം പൊന്നാനി എംഎൽഎയെ ക്ഷണിച്ചത് ഔദ്യോഗിക ചട്ടങ്ങളുടെയും പ്രോട്ടോകോളിന്റെയും ലംഘനമാണെന്ന് സിപിഎം ആരോപിച്ചു. പരിപാടി സംഘടിപ്പിച്ചതിലെ പ്രോട്ടോകോൾ ലംഘനം ചൂണ്ടിക്കാട്ടി എംഎൽഎ എൻ.കെ. അക്ബർ നേരത്തെതന്നെ അധികൃതർക്ക് പരാതി നൽകിയിരുന്നു.