'ധ്യാനിന് അച്ഛനോടുള്ള സ്‌നേഹം ആ ഫോണ്‍ വാള്‍പേപ്പറില്‍ കാണാം'; ചര്‍ച്ചയായി ചിത്രങ്ങള്‍

അച്ഛന്‍ ശ്രീനിവാസന്റെ ചേതനയറ്റ ദേഹത്തിന് അരികില്‍ നെഞ്ചു കലങ്ങിയിരിക്കുന്ന ധ്യാന്‍ മലയാളികളുടെ മനസില്‍ ഒരിക്കലും മായാത്തൊരു കാഴ്ചയാണ്. അച്ഛനുമായുള്ള പിണക്കങ്ങളെക്കുറിച്ചും, പരസ്പരമുള്ള കളിയാക്കലുകളെക്കുറിച്ചുമൊക്കെ ധ്യാന്‍ സ്ഥിരം പറയാറുണ്ടൈങ്കിലും ആ മനസില്‍ അച്ഛനോടുണ്ടായിരുന്ന സ്‌നേഹം ഒരു വാക്കിന്റെ മധ്യസ്ഥത പോലുമില്ലാതെ മലയാളികളുടെ ഹൃദയത്തിലേക്ക് ചെന്നു കയറുകയായിരുന്നു.

ധ്യാന്‍ ശ്രീനിവാസന്റെ ഫോണിലെ വാള്‍ പേപ്പറാണ് ഇപ്പോള്‍ സോഷ്യല്‍ മീഡിയയിലെ ചര്‍ച്ചാ വിഷയം. കഴിഞ്ഞ ദിവസം ഒരു പരിപാടിയില്‍ പങ്കെടുക്കാനെത്തിയ ധ്യാനിന്റെ വിഡിയോയില്‍ നിന്നാണ് ആരാധകര്‍ ഫോണിന്റെ വാള്‍ പേപ്പര്‍ കണ്ടെത്തിയത്. ഇത് ചൂണ്ടിക്കാണിക്കുന്നൊരു കുറിപ്പ് സോഷ്യല്‍ മീഡിയയില്‍ വൈറലായി മാറിയിരിക്കുകയാണ്.

അച്ഛന്റെ ചിത്രമാണ് ധ്യാന്‍ ഫോണിന്റെ വാള്‍ പേപ്പറാക്കി വച്ചിരിക്കുന്നത്. ആ വാള്‍ പേപ്പര്‍ കണ്ടാല്‍ അറിയാം അച്ഛനോടുള്ള മകന്റെ സ്‌നേഹമെന്നാണ് കുറിപ്പില്‍ പറയുന്നത്. ധ്യാന്‍ എത്രത്തോളം അച്ഛനെ മിസ്സ് ചെയ്യുന്നുണ്ടെന്നും സ്‌നേഹിക്കുന്നുണ്ടെന്നും ഇതില്‍ നിന്ന് മനസ്സിലാക്കാമെന്നും കുറിപ്പില്‍ പറയുന്നു.

''കഴിഞ്ഞ ദിവസം കണ്ട ഒരു വീഡിയോ ആണിത്. ധ്യാനിന്റെ ഫോണ്‍ വാള്‍പേപ്പര്‍ ആയി വെച്ചിരിക്കുന്ന ശ്രീനിവാസന്‍ ചേട്ടന്റെ ഫോട്ടോ. ഒരു വാള്‍പേപ്പര്‍ വെച്ചത് കണ്ടിട്ട് വേണ്ട മകന് അച്ഛനോടുള്ള സ്‌നേഹം എത്രത്തോളമുണ്ടെന്ന് മനസിലാക്കാന്‍. എങ്കിലും ഈ ചിത്രങ്ങള്‍ കണ്ടപ്പോള്‍ എന്തോ ഒരു വിഷമം. ധ്യാന്‍ എത്രത്തോളം അച്ഛനെ മിസ്സ് ചെയ്യുന്നുണ്ടെന്നും സ്‌നേഹിക്കുന്നുണ്ടെന്നും ഇതില്‍ നിന്ന് മനസ്സിലാക്കാം'' എന്നാണ് കുറിപ്പ്.

2025 ഡിസംബര്‍ 20 നായിരുന്നു ശ്രീനിവാസന്റെ മരണം. സംവിധായകന്‍, തിരക്കഥാകൃത്ത്, നടന്‍ തുടങ്ങി വിവിധ മേഖലകളില്‍ പ്രതിഭ തെളിയിച്ചിട്ടുള്ള കലാകരന്‍. മലയാളികളുടെ നിത്യ ജീവിതത്തിന്റെ ഭാഗമായി മാറിയ സിനിമകളും കഥാപാത്രങ്ങളും ബാക്കി വച്ചാണ് അദ്ദേഹം യാത്രയായത്.