'റിലീസ് തിരക്കുകളില്‍ എന്റെ ജന്മദിനം ഓര്‍ക്കുമോ ആവോ?'; അമാലിന് സംശയം; സര്‍പ്രൈസുമായി ദുല്‍ഖര്‍

പുതിയ ചിത്രം ഐ ആം ഗെയിമിന്റെ റിലീസ് തിരക്കുകള്‍ക്കിടയിലും ഭാര്യ അമാല്‍ സൂഫിയയ്ക്ക് ജന്മദിനാശംസകള്‍ നേര്‍ന്ന് നടന്‍ ദുല്‍ഖര്‍ സല്‍മാന്‍. സോഷ്യല്‍ മീഡിയയില്‍ പങ്കുവച്ച രസകരമായ കുറിപ്പിലൂടെയാണ് ദുല്‍ഖറിന്റെ ആശംസ. അമാലിന്റെ മനോഹരമായ ചിത്രങ്ങളും ദുല്‍ഖര്‍ പങ്കുവച്ചിട്ടുണ്ട്.

പുതിയ സിനിമയുടെ പ്രൊമോഷന്‍ തിരക്കുകളില്‍ തന്റെ ജന്മദിനം ഭര്‍ത്താവ് മറക്കുമോ എന്ന് സംശയിക്കുന്ന അമാലിനെക്കുറിച്ചാണ് ദുല്‍ഖര്‍ കുറിപ്പില്‍ പറയുന്നത്. ഇറ്റ്‌സ് മൈ ലേഡീസ് ബര്‍ത്ത് ഡേ എന്ന ഹാഷ് ടാഗോടെയാണ് ദുല്‍ഖറിന്റെ പോസ്റ്റ്. അമാലിന്റെ ജന്മദിനത്തില്‍ ദുല്‍ഖര്‍ പങ്കുവെക്കുന്ന പോസ്റ്റുകള്‍ എന്നും ആരാധകരുടെ ശ്രദ്ധ നേടാറുണ്ട്.

''ഹും..! റിലീസിന്റെയും പ്രൊമോഷന്റെയും തിരക്കുകള്‍ക്കിടയില്‍ എന്റെ ഭര്‍ത്താവ് എന്റെ ജന്മദിനം ഓര്‍ക്കുമോ ആവോ?'', ധൈര്യമുണ്ടോ, ഞാന്‍ മറക്കുമോ എന്ന് നോക്കാം. എന്റെ റാണിയ്ക്ക് ഏറ്റവും സന്തോഷം നിറഞ്ഞ ജന്മദിനാശംസകള്‍. ഇത്രയും വര്‍ഷമായിട്ടും നിന്നെ പൊട്ടിച്ചിരിപ്പിക്കാനും, നിന്റെ ചിരി പകര്‍ത്താനും സാധിക്കുന്നുണ്ടല്ലോ'' എന്നാണ് ദുല്‍ഖറിന്റെ പോസ്റ്റ്.

പിന്നാലെ അമാലിന് ജന്മദിനാശംസകളുമായി സിനിമാ ലോകവും ആരാധകരുമൊക്കെ എത്തുകയാണ്. നടി കല്യാണി പ്രിയദര്‍ശനും അമാലിന് ആശംസയുമായെത്തിയിട്ടുണ്ട്. അതേസമയം കഴിഞ്ഞ ദിവസമാണ് ദുല്‍ഖറിന്റെ പുതിയ ചിത്രം ഐ ആം ഗെയിം തിയേറ്ററുകളിലെത്തിയത്. നഹാസ് ഹിദായത്ത് ഒരുക്കിയ സിനിമയിലെ ദുല്‍ഖറിന്റെ പ്രകടനം കയ്യടി നേടുന്നുണ്ട്. കയാദു ലോഹര്‍, ആന്റണി വര്‍ഗീസ്, കതിര്‍ തുടങ്ങിയവരാണ് ചിത്രത്തിലെ മറ്റ് താരങ്ങള്‍.