ഡ്രൈവർമാരുടെ പെരുമാറ്റം ട്രാക്ക് ചെയ്യുന്നതിനും റോഡ് സുരക്ഷ മെച്ചപ്പെടുത്തുന്നതിനും എഐ ഉപയോഗിച്ച് യുഎഇ

അബുദാബി: റോഡപകടങ്ങൾ കുറയ്ക്കുന്നതിനുള്ള തുടർച്ചയായ ശ്രമങ്ങളുടെ ഭാഗമായി ഡ്രൈവർമാരുടെ പെരുമാറ്റം വിശകലനം ചെയ്യാൻ നിർമ്മിത ബുദ്ധി (എഐ) ഉപയോഗിച്ച് യുഎഇ പൊലീസ്

അപകട സ്ഥലങ്ങൾ തിരിച്ചറിയുന്നതിനുള്ള പ്രത്യേക പ്ലാറ്റ്‌ഫോമുകൾക്കൊപ്പം, ഡ്രൈവർമാർ റോഡുകളിൽ എങ്ങനെ പെരുമാറുന്നുവെന്ന് വിലയിരുത്തുന്നതിനായി എഐ അധിഷ്ഠിത നിരീക്ഷണ സംവിധാനങ്ങൾ പ്രവർത്തനക്ഷമമാക്കിയതായി ആഭ്യന്തര മന്ത്രാലയം അറിയിച്ചു.

ചെറുതും വലുതുമായ അപകടങ്ങളിൽ ഉൾപ്പെടുന്ന ഡ്രൈവർമാരെ ട്രാക്ക് ചെയ്യുകയും അവരുടെ പെരുമാറ്റങ്ങൾക്ക് അനുസൃതമായി ഘടനാപരമായ പരിശീലനം നൽകുകയും ചെയ്യുന്നു.

ഫെഡറൽ നാഷണൽ കൗൺസിൽ (എഫ്‌എൻ‌സി) സെഷനിൽ ആഭ്യന്തര മന്ത്രാലയം വെളിപ്പെടുത്തിയ ഈ റിപ്പോർട്ട്, യുഎഇയിലെ ഗതാഗത മേഖല നേരിടുന്ന ഒരു പ്രധാന വെല്ലുവിളിയായി മനുഷ്യരുടെ റോഡിലെ പെരുമാറ്റത്തെ എടുത്തുകാണിച്ചു.

റോഡിന്റെ ഗുണനിലവാരത്തിൽ യുഎഇ ആഗോളതലത്തിൽ അഞ്ചാം സ്ഥാനത്താണ്. എന്നാൽ ഗതാഗതവുമായി ബന്ധപ്പെട്ട അപകടങ്ങളും അതുമൂലമുണ്ടാകുന്ന പരിക്കുകളും മരണങ്ങളും ഇപ്പോഴും ആശങ്കയായി തുടരുന്നു. ഡ്രൈവർമാരുടെ പെരുമാറ്റമാണ് ഇത്തരം സംഭവങ്ങൾക്ക് പ്രധാന കാരണമായി കണ്ടെത്തിയിരിക്കുന്നത്.

ഡ്രൈവർമാരുടെ പെരുമാറ്റം വിശകലനം ചെയ്യാൻ യുഎഇയിലുടനീളമുള്ള പൊലീസ് അധികാരികൾ എഐ അധിഷ്ഠിത നിരീക്ഷണ സംവിധാനങ്ങൾ ഉപയോഗിക്കുന്നുണ്ടെന്ന് ആഭ്യന്തര മന്ത്രാലയത്തിലെ നിയമകാര്യ ഡയറക്ടർ ജനറൽ ബ്രിഗേഡിയർ ഡോ. റാഷിദ് സുൽത്താൻ അൽ ഖുദർ പറഞ്ഞു.

അപകട സ്ഥലങ്ങൾ ട്രാക്ക് ചെയ്യാൻ ഒരു സമർപ്പിത പ്ലാറ്റ്‌ഫോം ഉണ്ടെന്നും, വലുതും ചെറുതുമായ സംഭവങ്ങളിൽ ഉൾപ്പെടുന്ന ഡ്രൈവർമാരെ നിരീക്ഷിക്കുകയും അവരുടെ പെരുമാറ്റ രീതികളെ അടിസ്ഥാനമാക്കി അനുസൃതമായി ഘടനാപരമായ പരിശീലനം നൽകുകയും ചെയ്യുമെന്നും റാഷിദ് സുൽത്താൻ അൽ ഖുദർ കൂട്ടിച്ചേർത്തു.

ഡ്രൈവിങ്ങിലെ അപകടസാധ്യത വിലയിരുത്തുന്നതിന് മന്ത്രാലയം എഐ ഉപകരണങ്ങൾ ഉപയോഗിക്കുന്നുണ്ടെന്നും അശ്രദ്ധമായ ഡ്രൈവിങ് രീതി പരിഹരിക്കുന്നതിന് ലക്ഷ്യമിട്ടുള്ള സംരംഭങ്ങളും മാനദണ്ഡങ്ങളും നടപ്പിലാക്കാൻ ശ്രമിക്കുന്നുണ്ടെന്നും അദ്ദേഹം പറഞ്ഞു.

അവബോധം,തുടർച്ചയായ നിരീക്ഷണം എന്നിവയെ അടിസ്ഥാനമാക്കി ഉത്തരവാദിത്തമുള്ള ഡ്രൈവിങ് സംസ്കാരം കെട്ടിപ്പടുക്കുന്നതിന് സ്കൂളുകളും കുടുംബങ്ങളും മുതൽ മീഡിയ, ഡിജിറ്റൽ പ്ലാറ്റ്‌ഫോമുകൾ വരെയുള്ള വിശാലമായ സാമൂഹിക ഇടപെടലിന്റെയും ട്രാഫിക് വിദ്യാഭ്യാസത്തിന്റെയും പ്രാധാന്യം എഫ്‌എൻ‌സി അംഗങ്ങൾ വ്യക്തമാക്കി.

ഡ്രൈവർമാരെ സ്വാധീനിക്കുന്ന പെരുമാറ്റപരവും മാനസികവുമായ ഘടകങ്ങൾ മനസ്സിലാക്കുന്നതിൽ ശ്രദ്ധ കേന്ദ്രീകരിച്ച്, നയത്തിൽ ട്രാഫിക് സൈക്കോളജി കൂടുതൽ സംയോജിപ്പിക്കണമെന്ന് എഫ്‌എൻ‌സി അംഗം മോസ മുഹമ്മദ് അൽ ഷെഹിആവശ്യപ്പെട്ടു.

വ്യത്യസ്ത ഡ്രൈവിങ് പാറ്റേണുകൾ, വാഹനങ്ങൾ, സുരക്ഷാ ആവശ്യകതകൾ എന്നിവ കണക്കിലെടുത്താണ് യുഎഇ റോഡുകൾ അന്താരാഷ്ട്ര മാനദണ്ഡങ്ങൾക്കനുസൃതമായി രൂപകൽപ്പന ചെയ്യുന്നതെന്ന് ഊർജ, അടിസ്ഥാന സൗകര്യ മന്ത്രി സുഹൈൽ ബിൻ മുഹമ്മദ് അൽ മസ്രൂയി പറഞ്ഞു.