മദ്യനയക്കേസ്: കെജരിവാളിന്റെ ഹര്‍ജി ഇന്ന് സുപ്രീം കോടതിയില്‍; സിബിഐ മറുപടി നല്‍കും

ന്യൂഡല്‍ഹി: ഡല്‍ഹി മദ്യനയ അഴിമതി കേസിലെ അറസ്റ്റിനെതിരെ മുഖ്യമന്ത്രി അരവിന്ദ് കെജരിവാള്‍ നല്‍കിയ ഹര്‍ജി സുപ്രീംകോടതി ഇന്ന് പരിഗണിക്കും. ജസ്റ്റിസുമാരായ സൂര്യകാന്ത്, ഉജ്ജല്‍ ഭുയാന്‍ എന്നിവരടങ്ങുന്ന ബെഞ്ചാണ് ഹര്‍ജി പരിഗണിക്കുന്നത്. ഇടക്കാല ജാമ്യം തള്ളിയ കോടതി സിബിഐയോട് നിലപാട് തേടിയിരുന്നു.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

ഇതില്‍ സിബിഐ ഇന്ന് കോടതിയില്‍ മറുപടി നല്‍കും. കെജരിവാളിന് ജാമ്യം അനുവദിക്കുന്നതിനെ സിബിഐ എതിര്‍ത്തേക്കും. അന്വേഷണത്തോട് സഹകരിച്ചില്ലെന്നും, ചോദ്യം ചെയ്യലില്‍ കൃത്യമായ മറുപടി നല്‍കാതെ ഒഴിഞ്ഞുമാറുന്ന സമീപനമാണ് കെജരിവാള്‍ പുലര്‍ത്തിയതെന്നും സിബിഐ കോടതിയെ അറിയിക്കുമെന്നാണ് റിപ്പോര്‍ട്ട്.

അറസ്റ്റ് ശരിവച്ച ഡല്‍ഹി ഹൈക്കോടതി ഉത്തരവിനെതിരെയാണ് അരവിന്ദ് കെജരിവാള്‍ സുപ്രീംകോടതിയെ സമീപിച്ചത്. കേസില്‍ ജയിലിലായിരുന്ന മുന്‍ ഉപമുഖ്യമന്ത്രി മനീഷ് സിസോദിയക്ക് സുപ്രീംകോടതി ജാമ്യം അനുവദിച്ചിരുന്നു. ഇതേത്തുടര്‍ന്ന് തിഹാര്‍ ജയിലില്‍ 17 മാസത്തോളം തടവില്‍ കഴിഞ്ഞ സിസോദിയ പുറത്തിറങ്ങിയിരുന്നു.