പരിശീലക സംഘത്തില്‍ അടിമുടി മാറ്റം? ഇന്ത്യന്‍ ടീം കോച്ചായി ഗംഭീറിന്റെ നിയമനം ഉടന്‍; റിപ്പോര്‍ട്ട്

ന്യൂഡല്‍ഹി: ഇന്ത്യന്‍ ക്രിക്കറ്റ് ടീമിന്റെ മുഖ്യ പരിശീലകനായി ഗൗതം ഗംഭീറിനെ ഉടന്‍ നിയമിച്ചേക്കുമെന്ന് റിപ്പോര്‍ട്ട്. പുതിയ പരിശീലകനായി ഗംഭീറിനെ തെരഞ്ഞെടുത്തതായുള്ള ബിസിസിഐയുടെ ഔദ്യോഗിക അറിയിപ്പ് വരും ദിവസങ്ങളില്‍ എത്തുമെന്നും റിപ്പോര്‍ട്ട് പറയുന്നു.

നിലവിലെ പരിശീലകനായ രാഹുല്‍ ദ്രാവിഡിന്റെ കരാര്‍ ടി20 ലോകപ്പോടെ അവസാനിക്കും. ഇന്ത്യന്‍ പരിശീലക സ്ഥാനത്തേക്ക് രാഹുല്‍ ദ്രാവിഡിന്റെ കരാര്‍ നീട്ടിയേക്കില്ലെന്ന് റിപ്പോര്‍ട്ടുകളുണ്ടായിരുന്നു. ടി20 ലോകകപ്പ് അവസാനിച്ച ഉടന്‍ ജൂണ്‍ അവസാനത്തോടെ ഗംഭീര്‍ ഇന്ത്യന്‍ പരിശീലകനായി ചുമതലയേല്‍ക്കും എന്നാണ് റിപ്പോര്‍ട്ട്. 2027 ഏകദിന ലോകകപ്പ് വരെയായിരിക്കും ഗംഭീറിന്റെ കാലാവധി.

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

സപ്പോര്‍ട്ട് സ്റ്റാഫ് അംഗങ്ങളെ തീരുമാനിക്കാനുള്ള സ്വാതന്ത്ര്യം തനിക്ക് നല്‍കണമെന്ന് ഗംഭീര്‍ ബിസിസിഐയെ അറിയിച്ചതായി റിപ്പോര്‍ട്ടില്‍ പറയുന്നു. നിലവില്‍ ടീം ഇന്ത്യയുടെ ബാറ്റിങ് പരിശീലകന്‍ വിക്രം റാത്തോഡിനെ ബൗളിങ് കോച്ച് പരാസ് മാംബ്രെയും ഫീല്‍ഡിംഗ് കോച്ച് ടി ദിലീപുമാണ്. ഗംഭീര്‍ ചുമതലയേല്‍ക്കുന്നതോടെ ഇന്ത്യന്‍ സപ്പോര്‍ട്ട് സ്റ്റാഫിലും വലിയ മാറ്റം വന്നേക്കും.