ഫുട്ബോളിൽ ​ഗ്രീസ് ജർമനിയെ അട്ടിമറിച്ചു, ചരിത്രത്തിൽ ആദ്യം!

മ്യൂണിക്ക്: ചരിത്രത്തിൽ ആദ്യമായി ​ഗ്രീസ് ഫുട്ബോൾ ടീം മുൻ ലോക ചാംപ്യൻമാരായ ജർമനിയെ അട്ടിമറിച്ചു. അതും ജർമൻ മണ്ണിൽ വച്ചു തന്നെ! യുവേഫ നേഷൻസ് ലീ​ഗ് പോരിലാണ് മറുപടിയില്ലാത്ത ഒറ്റ ​ഗോളിന് അവർ ചരിത്രത്തിലാദ്യമായി ജർമനിയെ പരാജയപ്പെടുത്തിയത്.

ജർമനിയുടെ മുഖ്യ പരിശീലകനായി ചുമതലയേറ്റ യുർ​ഗൻ ക്ലോപിന്റെ രണ്ടാം പോരായിരുന്നു ഇത്. ആദ്യ മത്സരത്തിൽ കരുത്തരായ നെതർലൻഡ്സിനെ 1-1നു സമനിലയിൽ തളച്ചിരുന്നു. രണ്ടാം പോരിൽ ഇപ്പോൾ തോൽവിയും അദ്ദേഹത്തിനു നേരിടേണ്ടി വന്നു.

74ാം മിനിറ്റിൽ ദിമിത്രിയോസ് കുർബെലിസിന്റെ ഷോട്ട് ​ഗതി മാറി ​ഗോളായതാണ് മത്സരത്തിൽ നിർണായകമായത്. ജർമനിയുടെ പെനാൽറ്റി ബോക്സിനു പുറത്തു നിന്ന് കുർബെലിസ് തൊടുത്ത ഷോട്ട് ജർമൻ ക്യാപ്റ്റൻ ജോഷ്വ കിമ്മിചിന്റെ ശരീരത്തിൽ തട്ടി ​ഗതിമാറി വലയിൽ കയറുന്നത് ​ഗോൾ കീപ്പർ അലക്സാണ്ടർ നുബെലിന് നോക്കി നിൽക്കാൻ മാത്രമെ സാധിച്ചുള്ളു. ജർമനിയ്ക്ക് അങ്ങേയറ്റം നിരാശ സമ്മാനിക്കുന്ന രാത്രിയാണ് ഓ​ഗ്സ്ബർ​ഗിൽ അരങ്ങേറിയത്.

​ഗ്രീസിന്റെ ഹൾ സിറ്റി ​ഗോൾ കീപ്പർ കോൺസ്റ്റാന്റിനോസ് സോലാക്കിസ് മത്സരത്തിലുടനീളം മികച്ച സേവുകളുമായി ടീമിനെ കാത്തു. കരിം അഡെയേമി, രണ്ടാം പകുതിയിൽ കിമ്മിച് എടുത്ത ഫ്രീകിക്ക്, പകരക്കാരനായി രണ്ടാം പകുതിയിൽ ഇറങ്ങിയ സെർജ് ​ഗ്നാബ്രി, ബംബാസെ കോണ്ടെ എന്നിവരുടെയെല്ലാം ശ്രമങ്ങൾ സോലാക്കിസ് സമർഥമായി തന്നെ തടഞ്ഞിട്ടു. ജർമനി 14 ഷോട്ടുകൾ തൊടുത്തു. അതിൽ 5 ഓൺ ടാർ​ഗറ്റും വന്നു. എന്നാൽ ഒന്നു പോലും വലയിൽ കയറാൻ സോലാക്കിസ് സമ്മതിച്ചില്ല.

1960 നവംബർ മുതൽ ഇതുവരെ 10 മത്സരങ്ങളാണ് ജർമനിയും ​ഗ്രീസും നേർക്കുനേർ വന്നത്. ഇതിൽ 7 മത്സരങ്ങളിലും ജർമനി വിജയിച്ചു. 3 പോരാട്ടങ്ങൾ സമനിലയിലും അവസാനിച്ചു. ഒടുവിൽ 11ാം മത്സരത്തിൽ ​ഗ്രീസ് ജർമനിയെ വീഴ്ത്തി.

ക്ലോപിനെ സംബന്ധിച്ച് ഈ പോരാട്ടങ്ങൾ പരീക്ഷണങ്ങൾക്കും ഫലങ്ങൾക്കും പ്രാധാന്യമുള്ളതാണ്. ഓ​ഗ്സ്ബർ​ഗിൽ തന്റെ ടീം ഇതിലും മികവോടെ കളിക്കുമെന്നു അദ്ദേഹം പ്രതീക്ഷിച്ചിരുന്നു. ടീമിൽ സ്ഥാനമുറപ്പിക്കാൻ ആ​ഗ്രഹിക്കുന്ന അനുഭവ സമ്പത്ത് ഒട്ടുമില്ലാത്ത ടീമിനെയാണ് ക്ലോപ് കളിക്കാനിറക്കിയത്. വലിയ മത്സരങ്ങളുടെ സമ്മർദ്ദം കൈകാര്യം ചെയ്യുന്നതിൽ പക്ഷേ യുവ ജർമൻ താരങ്ങൾ പരാജയപ്പെട്ടു.

തന്റെ ടീമിനെ മികച്ച രീതിയിൽ സജ്ജമാക്കാനും ആവശ്യമായ മാറ്റങ്ങൽ വരുത്താനും ക്ലോപിന് ഇനിയും സമയമുണ്ട്. നേഷൻസ് ലീ​ഗിൽ ​ഗ്രൂപ്പ് ബിയിൽ ജർമനി മൂന്നാം സ്ഥാനത്താണ്. പുതിയ കളിക്കാരേയും പുതിയ തന്ത്രങ്ങളും കളത്തിൽ അവതരിപ്പിച്ച് സെർബിയക്കെതിരെ വിജയിക്കാനും എവേ പോരിൽ ​ഗ്രീസിനെ വീഴ്ത്താനും സാധിക്കുമെന്ന പ്രതീക്ഷയിലാണ് ക്ലോപും സംഘവും. ​ഗ്രൂപ്പിലെ അവസാന പോരാട്ടത്തിൽ ഹോമിൽ നെതർലൻഡ്സുമായും ജർമനിക്ക് പോരാട്ടമുണ്ട്.