വിജയ് ദാഹിയ ഡല്‍ഹി പരിശീലകന്‍; കോഹ്‌ലിയുടെ കുട്ടിക്കാല കോച്ച് മെന്റര്‍

ന്യൂഡല്‍ഹി: ഡല്‍ഹി ക്രിക്കറ്റ് ടീമിന്റെ പുതിയ പരിശീലകനായി മുന്‍ ഇന്ത്യന്‍ വിക്കറ്റ് കീപ്പര്‍ ബാറ്റര്‍ വിജയ് ദാഹിയയെ നിയമിച്ചു. മുന്‍ ഇന്ത്യന്‍ നായകന്‍ വിരാട് കോഹ്‌ലിയുടെ കുട്ടിക്കാലത്തെ പരിശീലകന്‍ രാജ്കുമാര്‍ ശര്‍മയെ സംസ്ഥാന ടീമുകളുടെ മെന്ററായും നിയമിച്ചിട്ടുണ്ട്. ഡല്‍ഹി ആന്‍ഡ് ഡിസ്ട്രക്റ്റ് ക്രിക്കറ്റ് അസോസിയേഷനാണ് 2026-27 ആഭ്യന്തര സീസണിലേക്കായി പുതിയ പരിശീലകരെ നിയമിച്ചത്.

ഇന്ത്യക്കായി 2 ടെസ്റ്റുകളും 19 ഏകദിനങ്ങളും കളിച്ച താരമാണ് വിജയ് ദാഹിയ. നേരത്തെയും ഡല്‍ഹിയുടെ മുഖ്യ പരിശീലകനായി വിജയ് ദാഹിയ വന്നിട്ടുണ്ട്. 16 വര്‍ഷം കാത്തിരുന്ന രഞ്ജി ട്രോഫി കിരീടം 2007-08 സീസണില്‍ ഡല്‍ഹി നേടുമ്പോള്‍ അന്ന് ടീമിനെ പരിശീലിപ്പിച്ചത് വിജയ് ദാഹിയയാണ്.

ഐപിഎല്ലില്‍ വിവിധ ടീമുകളുടെ കോച്ചിങ് സംഘത്തിലും നേരത്തെ വിജയ് ദാഹിയ അംഗമായിരുന്നു. 2012, 2014 വര്‍ഷങ്ങളില്‍ കൊല്‍ക്കത്ത നൈറ്റ്‌റൈഡേഴ്‌സ് ഐപിഎല്‍ കിരീടം നേടുമ്പോള്‍ വിജയ് ദാഹിയ കോച്ചിങ് സ്റ്റാഫിലുണ്ടായിരുന്നു.

ഡൽഹി ക്യാപിറ്റൽസ് കോച്ചിങ് സ്റ്റാഫിലും വിജയ് ദാഹിയ അം​ഗമായിരുന്നു. ലഖ്‌നൗ സൂപ്പര്‍ ജയന്റ്‌സിന്റെ സഹ പരിശീലകനായും അദ്ദേഹം പ്രവര്‍ത്തിച്ചിട്ടുണ്ട്. ആഭ്യന്തര ക്രിക്കറ്റില്‍ ഉത്തര്‍പ്രദേശ് ടീമിന്റേയും പരിശീലകനായിരുന്നു വിജയ് ദാഹിയ.