1.36 ലക്ഷം രൂപ വില; പുതിയ പള്‍സര്‍ 220എഫ് വിപണിയില്‍, അറിയാം ഫീച്ചറുകള്‍

ന്യൂഡല്‍ഹി: പ്രമുഖ ഇരുചക്ര വാഹന നിര്‍മ്മാതാക്കളായ ബജാജിന്റെ ജനപ്രിയ മോഡലായ പള്‍സര്‍ 220എഫിന്റെ 2026 പതിപ്പ് വിപണിയില്‍ അവതരിപ്പിച്ചു. 1.36 ലക്ഷം രൂപയാണ് എക്‌സ് ഷോറൂം വില. പുതിയ എല്‍ഇഡി പ്രൊജക്ടര്‍ ഹെഡ്ലൈറ്റും (LED projector headlight) എല്‍ഇഡി പൊസിഷന്‍ ലൈറ്റുകളുമാണ് ഈ ബൈക്കിന്റെ പ്രധാന സവിശേഷതകള്‍.

ലോ ബീമും ഹൈ ബീമും ഒരുമിച്ച് ഉള്‍ക്കൊള്ളുന്ന ഒരൊറ്റ പ്രൊജക്ടര്‍ യൂണിറ്റാണ് പുതിയ ഹെഡ്ലൈറ്റ് ക്ലസ്റ്ററിലുള്ളത്. എന്നാല്‍ ഇതിന്റെ മുന്‍പത്തെ മോഡലില്‍ ലോ ബീമിനായി പ്രൊജക്ടറും ഹൈ ബീമിനായി മള്‍ട്ടി-റിഫ്‌ലെക്ടര്‍ യൂണിറ്റുമായിരുന്നു നല്‍കിയിരുന്നത്. പുതിയ പള്‍സര്‍ 220എഫിന്റെ പൊസിഷന്‍ ലൈറ്റുകളും ഇപ്പോള്‍ എല്‍ഇഡി യൂണിറ്റുകളിലേക്ക് മാറ്റിയിട്ടുണ്ട്. പരിഷ്‌കരിച്ച ഈ ലൈറ്റിങ് സജ്ജീകരണം ബൈക്കിന്റെ മുന്‍ഭാഗത്തിന് ആകര്‍ഷകമായ ഒരു പുതുമ നല്‍കുന്നു.

ബൈക്കിന്റെ മറ്റ് ഡിസൈനിലോ മെക്കാനിക്കല്‍ ഫീച്ചറുകളിലോ മാറ്റങ്ങളൊന്നുമില്ല. 8,500rpm-ല്‍ 20.1bhp കരുത്തും 7,000rpm-ല്‍ 18.55Nm ടോര്‍ക്കും ഉല്‍പ്പാദിപ്പിക്കുന്ന 220cc, എയര്‍/ഓയില്‍-കൂള്‍ഡ്, സിംഗിള്‍ സിലിണ്ടര്‍ എന്‍ജിന്‍ തന്നെയാണ് പള്‍സര്‍ 220എഫിന് ഇപ്പോഴുമുള്ളത്. 5-സ്പീഡ് ഗിയര്‍ബോക്‌സുമായാണ് ഈ എന്‍ജിന്‍ ഘടിപ്പിച്ചിരിക്കുന്നത്. ഓള്‍-എല്‍ഇഡി ലൈറ്റിങ്ങിന് പുറമെ മൊബൈല്‍ ചാര്‍ജിംഗ് പോര്‍ട്ടും ബ്ലൂടൂത്ത് കണക്റ്റിവിറ്റിയും ടേണ്‍-ബൈ-ടേണ്‍ നാവിഗേഷനുമുള്ള എല്‍സിഡി ഡിസ്പ്ലേയും ഈ ബൈക്ക് വാഗ്ദാനം ചെയ്യുന്നു.