വില 5.80 ലക്ഷം രൂപ മുതല്‍, നിരവധി പുതിയ ഫീച്ചറുകള്‍; അപ്‌ഡേറ്റ് ചെയ്ത എക്സ്റ്റര്‍ വിപണിയില്‍

ന്യൂഡല്‍ഹി: പ്രമുഖ വാഹന നിര്‍മ്മാതാക്കളായ ഹ്യുണ്ടായി ഇന്ത്യ അപ്‌ഡേറ്റ് ചെയ്ത എക്സ്റ്റര്‍ ഫെയ്‌സ് ലിഫ്റ്റ് ഇന്ത്യന്‍ വിപണിയില്‍ അവതരിപ്പിച്ചു. 5.80 ലക്ഷം രൂപ മുതലാണ് എക്‌സ് ഷോറൂം വില. കോംപാക്റ്റ് എസ്യുവിയുടെ ബുക്കിങ് ആരംഭിച്ചിട്ടുണ്ട്. 11,000 രൂപ അടച്ച് ബുക്ക് ചെയ്യാനുള്ള സൗകര്യമാണ് ഒരുക്കിയിരിക്കുന്നത്.

പുതുക്കിയ ഫ്രണ്ട്, റിയര്‍ ബമ്പര്‍, പുനര്‍രൂപകല്‍പ്പന ചെയ്ത ഗ്രില്‍, പുതിയ ഡയമണ്ട്-കട്ട് 15 ഇഞ്ച് അലോയ് വീലുകള്‍, ഒരു വിംഗ്-ടൈപ്പ് സ്പോയിലര്‍ എന്നിവയാണ് പുതുക്കിയ എക്‌സ്റ്റെറിന്റെ പ്രധാന സവിശേഷതകള്‍. കൂടാതെ ഗോള്‍ഡന്‍ ബ്രോണ്‍സ്, ടൈറ്റാനിയം ബ്ലാക്ക് മാറ്റ് എന്നി പുതിയ ഷെയ്ഡുകളും വാഹനം വാഗ്ദാനം ചെയ്യുന്നു.

അകത്ത്, കാബിനില്‍ പുതിയ ഡ്യുവല്‍-ടോണ്‍ നേവി ആന്‍ഡ് ഗ്രേ തീം, 3D കാര്‍ബണ്‍-പാറ്റേണ്‍ ഡാഷ്ബോര്‍ഡ് ഫിനിഷ്, പുതിയ ഫ്‌ലാറ്റ്-ബോട്ടം സ്റ്റിയറിംഗ് വീല്‍ എന്നിവയുണ്ട്. മടക്കാവുന്ന ഡ്രൈവര്‍ ആംറെസ്റ്റ്, പുതുക്കിയ അപ്‌ഹോള്‍സ്റ്ററി തുടങ്ങിയ അപ്ഡേറ്റുകള്‍ക്കൊപ്പം മെറ്റല്‍ പെഡലുകളും ഇത് അവതരിപ്പിക്കുന്നു.

ഡാഷ്‌ക്യാം, വയര്‍ലെസ് ആന്‍ഡ്രോയിഡ് ഓട്ടോ, ആപ്പിള്‍ കാര്‍പ്ലേ, ടൈപ്പ്-സി റിയര്‍ യുഎസ്ബി പോര്‍ട്ട്, കണക്റ്റഡ് സവിശേഷതകള്‍ എന്നിവയാണ് മറ്റു ഫീച്ചറുകള്‍. സണ്‍റൂഫ്, ഡിജിറ്റല്‍ ഇന്‍സ്ട്രുമെന്റ് ക്ലസ്റ്റര്‍, ഒടിഎ അപ്ഡേറ്റുകള്‍ എന്നിവയാണ് മറ്റ് ഹൈലൈറ്റുകള്‍.

പവര്‍ട്രെയിന്‍ ഓപ്ഷനുകളില്‍ മാറ്റമില്ല. 1.2 ലിറ്റര്‍ ഫോര്‍ സിലിണ്ടര്‍ പെട്രോള്‍ എന്‍ജിന്‍ മാനുവല്‍, എഎംടി ഗിയര്‍ബോക്സുകള്‍ക്കൊപ്പം വാഗ്ദാനം ചെയ്യുന്നു. ഡ്യുവല്‍ സിലിണ്ടര്‍ സജ്ജീകരണമുള്ള ഒരു സിഎന്‍ജി വേരിയന്റും ഉണ്ട്.