45 ലക്ഷം രൂപ വരെ വാർഷിക ശമ്പളം, എസ്ബിഐയിൽ ലീഡ് ബിസിനസ് അനലിസ്റ്റ് തസ്തികയിൽ ഒഴിവുകൾ; മെയ് നാല് വരെ അപേക്ഷിക്കാം

സ്റ്റേറ്റ് ബാങ്ക് ഓഫ് ഇന്ത്യ (എസ്‌ബി‌ഐ) ലീഡ് ബിസിനസ് അനലിസ്റ്റ് തസ്തികകളിലേക്കുള്ള നിയമനത്തിനുള്ള ഔദ്യോഗിക വിജ്ഞാപനം പുറത്തിറക്കി. എസ്‌ബി‌ഐ സ്പെഷ്യലിസ്റ്റ് കേഡർ ഓഫീസർ (എസ്‌സി‌ഒ) റിക്രൂട്ട്‌മെന്റ് 2026-27 എന്ന വിഭാഗത്തിൽ നിയമനം നടത്തുന്നതിനാണ് വിജ്ഞാപനം പ്രസിദ്ധീകരിച്ചിട്ടുള്ളത്.

ബി ടെക്/ബിഇ, എംഎസ്‌സി, എംഇ/എംടെക്, എം‌സി‌എ യോഗ്യതയുള്ള ഉദ്യോഗാർത്ഥികൾക്ക് അപേക്ഷിക്കാം. നിർദ്ദിഷ്ട വിഷയങ്ങളിലുള്ള യോഗ്യതയും നിശ്ചിത കാലയളവ് പ്രവൃത്തി പരിചയവും ആവശ്യമാണ്.

യോഗ്യതയുള്ളവരും താൽപ്പര്യമുള്ളവരുമായവർക്ക് എസ്ബിഐയുടെ ഔദ്യോഗിക വെബ്‌സൈറ്റ് വഴി ഓൺലൈനായി അപേക്ഷിക്കാം. അപേക്ഷാ സമർപ്പിക്കാനുള്ള അവസാന തീയതി മെയ് നാല് ആണ്.

തസ്തികയുടെ പേര്, യോഗ്യത, പ്രവൃത്തി പരിചയം

ലീഡ് ബിസിനസ് അനലിസ്റ്റ്

യോഗ്യത

ഇന്ത്യാ ഗവൺമെന്റ് / ഗവൺമെന്റ് റെഗുലേറ്ററി ബോഡികൾ അംഗീകരിച്ച സർവകലാശാലയിൽ നിന്നോ സ്ഥാപനത്തിൽ നിന്നോ കമ്പ്യൂട്ടർ സയൻസ് / സോഫ്റ്റ്‌വെയർ എൻജിനീയറിങ് / ഐടി / ഇലക്ട്രോണിക്സ് / ഇലക്ട്രിക്കൽ ആൻഡ് ഇലക്ട്രോണിക്സ് / ഡേറ്റാ സയൻസ് / എഐ ആൻഡ് എംഎൽ / അനലിറ്റിക്സ് അല്ലെങ്കിൽ തത്തുല്യമായ ബിഇ./ബി ടെക്.

അല്ലെങ്കിൽ

അംഗീകൃത സർവകലാശാല/സ്ഥാപനം/ബോർഡിൽ നിന്ന് കമ്പ്യൂട്ടർ സയൻസ്/സോഫ്റ്റ്‌വെയർ എൻജിനീയറിങ്/ഐടി/ഇലക്‌ട്രോണിക്‌സ്/ഇലക്‌ട്രിക്കൽ ആൻഡ് ഇലക്‌ട്രോണിക്‌സ്/ഡേറ്റാ സയൻസ്/എഐ ആൻഡ് എംഎൽ എന്നിവയിൽ എംസിഎ അല്ലെങ്കിൽ എം ടെക്./എംഎസ്‌സി അല്ലെങ്കിൽ തത്തുല്യം.

അഭികാമ്യം: അംഗീകൃത സർവകലാശാലയിൽ നിന്നുള്ള എംബിഎ (സിസ്റ്റം / ഫിനാൻസ് / ഓപ്പറേഷൻസ് / മാർക്കറ്റിങ്) അല്ലെങ്കിൽ തത്തുല്യം.

സർട്ടിഫിക്കേഷനുകൾ: പിഎംപി, സിബിഎപി (ഐഐബിഎ), പിഎംഐ-പിബിഎ, സ്‌ക്രം മാസ്റ്റർ (സിഎസ്എം/പിഎസ്എം), ഐടിഐഎൽ, പ്രിൻസ്2, സിക്സ് സിഗ്മ ഗ്രീൻ ബെൽറ്റ്, അല്ലെങ്കിൽ പ്രസക്തമായ ക്ലൗഡ് സർട്ടിഫിക്കേഷനുകൾ.

പ്രവൃത്തിപരിചയം, പ്രായപരിധി

യോഗ്യത നേടിയ ശേഷം ഐടി ഡൊമെയ്‌നിൽ കുറഞ്ഞത് എട്ട് വർഷത്തെ പ്രവൃത്തിപരിചയം. അതിൽ ബിസിനസ് അനലിസ്റ്റ് / ലീഡ് ബിസിനസ് അനലിസ്റ്റ് എന്ന നിലയിൽ കുറഞ്ഞത് അഞ്ച് വർഷത്തെ പരിചയവും നിർബന്ധമാണ്.

അഭികാമ്യം : ബാങ്കിങ്, ഫിനാൻഷ്യൽ സർവീസസ്, ഇൻഷുറൻസ് (BFSI) മേഖലകളിൽ കുറഞ്ഞത് മൂന്ന് വർഷത്തെ പ്രവൃത്തി പരിചയം.

ടെക്നിക്കൽ എക്സ്പോഷർ: ഒന്നിലധികം ഡെലിവറബിളുകളുള്ള വലിയ തോതിലുള്ള സാങ്കേതിക പ്രോഗ്രാമുകൾ കൈകാര്യം ചെയ്യുന്നതിൽ തെളിയിക്കപ്പെട്ട വൈദഗ്ദ്ധ്യം.

നൈപുണി: കോർ ബാങ്കിങ് ട്രാൻസ്ഫർമേഷൻ, പേയ്‌മെന്റുകൾ (UPI/Swift), റീട്ടെയിൽ ലെൻഡിങ്, ഡിജിറ്റൽ ലെൻഡിങ്, കോർപ്പറേറ്റ് ലെൻഡിങ്, കസ്റ്റമർ ലൈഫ് സൈക്കിൾ പ്രോജക്ടുകൾ, ജനറൽ ERP/CRM/വെബ്-ആപ്പ് വികസനം എന്നിവയിൽ വൈദഗ്ധ്യം .

പ്രായപരിധി: 30-40 വയസ്സ് (2026 മാർച്ച് 31 അടിസ്ഥാനമാക്കി)

അർഹതയുള്ളവർക്ക് മാനദണ്ഡങ്ങൾക്ക് അനുസൃതമായ ഇളവ് ലഭിക്കും.

ശമ്പളം, തെരഞ്ഞെടുപ്പ് രീതി, നിയമന രീതി, ഒഴിവുകളുടെ എണ്ണം

ശമ്പളം: (വാർഷിക CTC) 45 ലക്ഷം രൂപ വരെ (പ്രതിമാസം 3.75 ലക്ഷം വരെ). (പരിചയവും നിലവിലെ CTC യും അടിസ്ഥാനമാക്കി)

തെരഞ്ഞെടുപ്പ് രീതി : ലഭിക്കുന്ന അപേക്ഷകകളിൽ നിന്ന് ചുരുക്കപ്പട്ടിക തയ്യാറാക്കും. ചുരുക്കപ്പട്ടികയിൽ ഉൾപ്പെട്ടവരുമായി വ്യക്തിഗത അഭിമുഖം നടത്തും. അഭിമുഖത്തെ അടിസ്ഥാനമാക്കിയായിരിക്കും അർഹരായ ഉദ്യോഗാർത്ഥികളെ തെരഞ്ഞെടുക്കക.

നിയമന രീതി: കരാർ അടിസ്ഥാനത്തിൽ അഞ്ച് വർഷത്തേക്ക്

അഡ്മിനിസ്ട്രേറ്റീവ് ആവശ്യകത അനുസരിച്ച് മുംബൈയിലോ ഇന്ത്യയിലെവിടെയെങ്കിലുമോ പോസ്റ്റിങ് ലഭിക്കാം.

ഒഴിവുകളുടെ എണ്ണം: എട്ട്

അപേക്ഷാ ഫീസും മറ്റ് വിവരങ്ങളും

അപേക്ഷാ ഫീസ്

ജനറൽ / ഇഡബ്ല്യുഎസ് / ഒബിസി വിഭാഗങ്ങളിലെ ഉദ്യോഗാർത്ഥികൾക്ക്: 750 രൂപ

എസ്‌സി / എസ്ടി / പിഡബ്ല്യുബിഡി വിഭാഗങ്ങളിലെ ഉദ്യോഗാർത്ഥികൾ: അപേക്ഷ ഫീസ് അടയ്ക്കേണ്ടതില്ല.

അപേക്ഷിക്കാനും ഫീസ് അടയ്ക്കാനുമുള്ള അവസാന തീയതി: മെയ് നാല് (04-05-2026)

അപേക്ഷ സമർപ്പിക്കാനുള്ള ലിങ്ക് ഇവിടെ കാണാം

വിശദമായ വിജ്ഞാപനം ഇവിടെ വായിക്കാം.