കറ്റാർവാഴ ജെൽ ദിവസവും ഉപയോഗിക്കാമോ? നേരിട്ട് മുഖപുരട്ടുമ്പോൾ ശ്രദ്ധിക്കേണ്ട കാര്യങ്ങൾ

മുഖസൗന്ദര്യത്തിന് വലിയ സൈഡ് ഇഫക്ട് ഒന്നുമില്ലാതെ വീട്ടിൽ സുരക്ഷിതമായി ഉപയോ​ഗിക്കുന്ന ഒന്നാണ് കറ്റാർവാഴ ജെൽ. ചർമത്തിന് തണുപ്പ് നൽകാനും ഈ‍ർപ്പം നിലനിർത്താനും മുഖക്കുരു മാറാനുമൊക്കെ കറ്റാർവാഴ സഹായിക്കും. എന്നാൽ ദിവസവും കറ്റാർവാഴ ജെൽ മുഖത്ത് പുരട്ടുന്നത് എല്ലാവർക്കും സുരക്ഷിതമാണോ?

കറ്റാർവാഴ ജെൽ ഉപയോ​ഗിക്കുമ്പോൾ ശ്രദ്ധിക്കേണ്ട ചില കാര്യങ്ങൾ ഇതൊക്കെയാണ്

ഗുണനിലവാരമുള്ള ​ശുദ്ധമായ കറ്റാർവാഴ ജെൽ ദിവസവും ഉപയോ​ഗിക്കുന്നത് സുരക്ഷിതമാണ്. എന്നാൽ എല്ലാവരുടെയും ചർമം ഒരുപോലെയല്ലാത്തതു കൊണ്ട് ചിലർക്ക് ഇത് അലർജി, ചൊറിച്ചിൽ പോലുള്ള പ്രശ്നങ്ങൾ ഉണ്ടാക്കാം.

കറ്റാർവാഴ ജെല്ലിന്റെ പ്രധാന ഗുണങ്ങൾ

• കറ്റാർവാഴ ചർമത്തെ മോയ്സ്ചറൈസ് ചെയ്യുന്നു. ഇത് ചർമ്മം വരണ്ടുപോകാതെ സംരക്ഷിക്കുകയും മൃദുത്വം നൽകുകയും ചെയ്യുന്നു.

• സൺബേൺ ഉണ്ടായാൽ കറ്റാർവാഴ ജെൽ തണുപ്പ് നൽകുകയും അസ്വസ്ഥത കുറയ്ക്കാൻ സഹായിക്കുകയും ചെയ്യുന്നു.

• കറ്റാർവാഴയ്ക്ക് നേരിയ ആന്റി-ഇൻഫ്ലമേറ്ററി, ആന്റിമൈക്രോബിയൽ ഗുണങ്ങളുള്ളതിനാൽ മുഖക്കുരുവിനൊപ്പം ഉണ്ടാകുന്ന ചുവപ്പും വീക്കവും കുറയ്ക്കാൻ സഹായിക്കും. എന്നാൽ മുഖക്കുരു മാറാനുള്ള പ്രതിവിധിയായി കറ്റാർവാഴയെ കാണരുത്.

• സെൻസിറ്റീവ് ചർമമുള്ളവരിൽ ചെറിയ പ്രകോപനങ്ങൾ ശമിപ്പിക്കാൻ ചിലപ്പോൾ സഹായകമാകും.

ദിവസവും ഉപയോഗിക്കുമ്പോൾ ലഭിക്കാവുന്ന ഗുണങ്ങൾ

• ചർമത്തിലെ ഈർപ്പം നിലനിർത്തും.

• മുഖം ഫ്രഷായി തോന്നും.

• ചെറിയ ചുവപ്പും പ്രകോപനവും കുറയാം.

• സ്കിൻ ബാരിയർ സംരക്ഷിക്കാൻ സഹായിക്കും.

• മൃദുവായ തിളക്കം ലഭിക്കാം.

എന്നാൽ എല്ലാവർക്കും അനുയോജ്യമല്ല, ചൊറിച്ചിലോ, കത്തുന്നതു പോലെ അനുഭവപ്പെടുകയോ ചുവപ്പോ പ്രത്യക്ഷപ്പെട്ടാൽ ഉപയോ​ഗം ഉടൻ നിർത്തണം. ആദ്യമായി ഉപയോഗിക്കുന്നവർ, കൈയുടെ ഉള്ളിലോ ചെവിയുടെ പിന്നിലോ അല്പം ജെൽ പുരിട്ടി പാച്ച് ടെസ്റ്റ് നടത്തണം.

കറ്റാർവാഴ ഉപയോ​ഗിക്കേണ്ടത് എങ്ങനെ

രാവിലെ മുഖം നന്നായി കഴുകിയ ശേഷം, കറ്റാർ വാഴ ജെൽ പുരട്ടാം. ഉണങ്ങിയ ശേഷം മോയ്സ്ചറൈസറും സൺസ്ക്രീനും ഉപയോഗിക്കുക. രാത്രിയും മുഖം വൃത്തിയായി കഴുകിയ ശേഷം ഉപയോ​ഗിക്കാവുന്നതാണ്.

വീട്ടിലെ കറ്റാർവാഴ നേരിട്ട് ഉപയോഗിക്കാമോ?

വീട്ടിൽ വളർത്തുന്ന കറ്റാർവാഴ നേരിട്ട് ചർമത്തിൽ പുരട്ടുന്നത് സുരക്ഷിതമാണ്. എന്നാൽ ഉപയോഗിക്കുന്നതിന് മുൻപ്,

• ഇല നന്നായി കഴുകുക.

• മഞ്ഞ നിറത്തിലുള്ള ലാറ്റക്സ് ഭാഗം പൂർണമായും നീക്കം ചെയ്യുക.

• സുതാര്യമായ ജെൽ മാത്രം ഉപയോഗിക്കുക.

• ശുചിത്വം ഉറപ്പാക്കുക.

• തയ്യാറാക്കിയ ജെൽ കുറച്ച് ദിവസത്തിനുള്ളിൽ ഉപയോഗിച്ച് തീർക്കുക.

വിപണിയിലെ കറ്റാർവാഴ ജെൽ വാങ്ങുമ്പോൾ ശ്രദ്ധിക്കേണ്ടത്

• ആൽക്കഹോൾ കുറവുള്ളത് തിരഞ്ഞെടുക്കുക.

• കൃത്രിമ സുഗന്ധം കുറഞ്ഞത് നല്ലതാണ്.

• അനാവശ്യ നിറങ്ങൾ ചേർക്കാത്തത് തിരഞ്ഞെടുക്കുക.

• വിശ്വസനീയമായ ബ്രാൻഡ് തിരഞ്ഞെടുക്കുക.

• കാലാവധി പരിശോധിക്കുക.