തൊടുപുഴ: തൊടുപുഴയിൽ ഒന്നര കിലോയോളം കഞ്ചാവുമായി സിപിഎം പ്രാദേശിക നേതാവടക്കം മൂന്ന് പേർ പിടിയിൽ. നഗരത്തിലെ പ്രസ് ക്ലബ്ബിന് സമീപം തട്ടുകട നടത്തുന്ന പെരുമ്പിള്ളിച്ചിറ സ്വദേശി സിജോ ജോർജാണ് പിടിയിലായത്. തട്ടുകടയിലെ ജീവനക്കാരായ കാക്കനാട് സ്വദേശി യാസീൻ അഷറഫ്, എരുമേലി സ്വദേശി ആഷിക് അൻസാരി എന്നിവരെയും പൊലീസ് കസ്റ്റഡിയിലെടുത്തു.

തൊടുപുഴ നഗരത്തിലെ രാത്രികാല തട്ടുകടകൾ കേന്ദ്രീകരിച്ച് ലഹരിവിൽപ്പന നടക്കുന്നുണ്ടെന്ന വിവരം പൊലീസിന് ലഭിച്ചിരുന്നു. ഇതിന്റെ ഭാഗമായി രാത്രികാല കടകൾക്ക് നിയന്ത്രണവും ഏർപ്പെടുത്തിയിരുന്നു. തുടർന്ന് നടത്തിയ പരിശോധനയിലാണ് സിജോ ജോർജിനെക്കുറിച്ചുള്ള വിവരങ്ങൾ ലഭിച്ചതും പ്രതിയെ അറസ്റ്റ് ചെയ്തതും.

പെരുമ്പിള്ളിച്ചിറയ്ക്ക് സമീപം മടത്തിക്കണ്ടത്തുള്ള സിജോയുടെ വീട്ടിൽ നിന്നാണ് കഞ്ചാവ് പിടിച്ചെടുത്തതെന്ന് പൊലീസ് അറിയിച്ചു. വിൽപ്പനയ്ക്കായി എത്തിച്ചതെന്ന് കരുതുന്ന കഞ്ചാവ് ചെറിയ പൊതികളാക്കി വിതരണം ചെയ്യാൻ ഉപയോഗിക്കുന്ന പാക്കറ്റുകളും കണ്ടെത്തിയിട്ടുണ്ട്. തൊടുപുഴയിലെ കോളജുകളും തട്ടുകടകളും കേന്ദ്രീകരിച്ച് അന്വേഷണം തുടരുമെന്ന് പൊലീസ് അറിയിച്ചു.