'ഗ്ലോബൽ ഐക്കൺ'; ലോകപ്രശസ്ത വീഡിയോ ​ഗെയിമിൽ താരമായി രാജമൗലി

ലോകത്തു തരംഗമായ വിഡിയോ ഗെയ്മിൽ അഭിനേതാവായി എത്തി ഇന്ത്യൻ സിനിമാ സംവിധായകൻ എസ്.എസ്. രാജമൗലി. പ്രശസ്ത ഗെയിം ക്രിയേറ്റർ ഹിഡിയോ കോജിമ ഒരുക്കിയ ജാപ്പനീസ് വിഡിയോ ഗെയിം ‘ഡെത്ത് സ്ട്രാൻഡിങ് 2: ഓൺ ദ് ബീച്ചി’ലാണ് അതിഥി വേഷത്തിൽ‍ രാജമൗലി എത്തുന്നത്. രാജമൗലിയുടെ മകനും ലൈൻ പ്രൊഡ്യൂസറുമായ എസ്.എസ്. കാർത്തികേയയും ഇതേ വിഡിയോ ​ഗെയിമിൽ അഭിനയിച്ചിട്ടുണ്ട്.

ജൂൺ 26-ന് ആ​ഗോളതലത്തിൽ വീഡിയോ ​​​ഗെയിം പുറത്തിറങ്ങും. ​രാജമൗലിയും കാർത്തികേയയും പ്രത്യക്ഷപ്പെടുന്ന ക്ലിപ്പ് ഇപ്പോൾ തന്നെ സോഷ്യൽ മീഡിയയിൽ വൈറലായിക്കൊണ്ടിരിക്കുകയാണ്. രാജമൗലിയെയും കാർത്തികേയയെയും യഥാക്രമം ദി അഡ്വഞ്ചറർ ആയും അഡ്വഞ്ചററുടെ മകനായുമാണ് ​ഗെയിമിൽ ഉൾപ്പെടുത്തിയിരിക്കുന്നത്. മറ്റൊരു ഇന്ത്യൻ താരങ്ങൾക്കും എന്തിന് ലോക താരങ്ങൾക്കു പോലും പറ്റാത്ത കാര്യമായതിനാൽ തന്നെ 'ഗ്ലോബൽ ഐക്കൺ' എന്നാണ് ആരാധകർ രാജമൗലിയെ വിശേഷിപ്പിച്ചിരിക്കുന്നത്.

ഏപ്രിലിൽ കോജിമയും രാജമൗലിയും കാർത്തികേയയും വെർച്വൽ മീറ്റിങ് നടത്തിയകാര്യം കാർത്തികേയ ഇൻസ്റ്റഗ്രാമിലൂടെ അറിയിച്ചിരുന്നു. ‘ആർആർആർ’പുറത്തിറങ്ങിയ സമയത്ത്, രാജമൗലി ജപ്പാനിൽ കോജിമയുടെ സ്റ്റുഡിയോ സന്ദർശിച്ചതും വാർത്തയായിരുന്നു.