വാഹനം ഓടിക്കുമ്പോള്‍ മൊബൈല്‍ ഫോണ്‍ തൊടണ്ട! പിടിക്കപ്പെട്ടാല്‍ വന്‍പിഴ

ഫുജൈറ: വാഹനം ഓടിക്കുമ്പോള്‍ റോഡില്‍ നിന്ന് ശ്രദ്ധ തിരിക്കുന്ന ഡ്രൈവര്‍മാര്‍ക്ക് കര്‍ശന മുന്നറിയിപ്പുമായി ഫുജൈറ പൊലീസ്. മൊബൈല്‍ ഫോണ്‍ ഉപയോഗിക്കുകയോ മറ്റ് കാര്യങ്ങളില്‍ ശ്രദ്ധാലുക്കളാകുകയോ ചെയ്തുകൊണ്ട് ഡ്രൈവിങ് നടത്തിയാല്‍ 800 ദിര്‍ഹം പിഴയും 4 ട്രാഫിക് ബ്ലാക്ക് പോയിന്റുകളും ലഭിക്കുമെന്ന് പൊലീസ് സോഷ്യല്‍ മീഡിയയിലൂടെ ഓര്‍മ്മിപ്പിച്ചു.

എക്‌സ് പേജില്‍ പങ്കുവെച്ച പോസ്റ്ററിലൂടെയാണ് പൊലീസ് ഡ്രൈവര്‍മാര്‍ക്ക് മുന്നറിയിപ്പ് നല്‍കിയിരിക്കുന്നത്. (യുഎഇയില്‍ 12 മാസത്തിനുള്ളില്‍ 24 ബ്ലാക്ക് പോയിന്റുകള്‍ ലഭിച്ചാല്‍ ഡ്രൈവിംഗ് ലൈസന്‍സ് സസ്‌പെന്‍ഡ് ചെയ്യപ്പെടും).

'വാഹനം ഓടിക്കുമ്പോള്‍ മൊബൈല്‍ ഫോണ്‍ ഉപയോഗിച്ചോ അല്ലാതെയോ റോഡില്‍ നിന്ന് ശ്രദ്ധ തിരിക്കുന്നത് നിയമലംഘനമാണ്, എന്ന് പോസ്റ്ററില്‍ വ്യക്തമാക്കുന്നു. കൂടാതെ, നിങ്ങളുടെയും മറ്റുള്ളവരുടെയും സുരക്ഷയ്ക്കായി റോഡില്‍ ശ്രദ്ധ കേന്ദ്രീകരിക്കൂ,' ഫുജൈറ പൊലീസ് പറഞ്ഞു.

യാത്രക്കാരുടെയും മറ്റ് റോഡ് ഉപയോക്താക്കളുടെയും സുരക്ഷ ഉറപ്പാക്കുന്നതിന്റെ ഭാഗമായി യുഎഇയിലെ വിവിധ പൊലീസ് വകുപ്പുകള്‍ ഇത്തരം ബോധവല്‍ക്കരണങ്ങളും മുന്നറിയിപ്പുകളും നല്‍കുന്നത്.