ത്രില്ലര്‍ 'തുടങ്ങും മുന്‍പേ' മഴയെത്തി; ബ്രിസ്‌ബെയ്ന്‍ ടെസ്റ്റ് സമനിലയില്‍

ബ്രിസ്‌ബെയ്ന്‍: മഴ രസംകൊല്ലിയായ ബ്രിസ്‌ബെയ്ന്‍ ടെസ്റ്റ് ഒടുവില്‍ സമനിലയില്‍ അവസാനിച്ചു. 275 റണ്‍സ് വിജയലക്ഷ്യവുമായി ഇന്ത്യ രണ്ടാം ഇന്നിങ്‌സ് തുടങ്ങി അധികം വൈകാതെ തന്നെ മഴ കളി മുടക്കി. സ്‌കോര്‍ ബോര്‍ഡില്‍ 8 റണ്‍സ് ചേര്‍ത്തപ്പോഴേക്കും മഴ എത്തി. ഇതോടെ ഫല പ്രതീക്ഷയില്ലാത്ത മത്സരം അവസാനിപ്പിച്ചു.

യശസ്വി ജയ്സ്വാള്‍ (4), കെഎല്‍ രാഹുല്‍ (4) എന്നിവര്‍ ക്രീസില്‍ നില്‍ക്കുമ്പോള്‍ മോശം വെളിച്ചവും മഴയും കാരണം ടീ ബ്രേക്ക് എടുത്തു. എന്നാല്‍ മഴ മാറാതെ നിന്നതോടെ മത്സരം തുടരേണ്ട എന്ന തീരുമാനത്തിലെത്തുകയായിരുന്നു.

രോഹിത് നായക പദവി ഒഴിയണം, സെലക്ഷന്‍ കമ്മിറ്റി തീരുമാനത്തിനായി കാത്തിരിക്കരുത്; സുനില്‍ ഗാവസ്‌കര്‍

നേരത്തെ രണ്ടാം ഇന്നിങ്‌സില്‍ 89 ന് ഏഴ് എന്ന നിലയിലെത്തിയപ്പോള്‍ ഓസീസ് ഇന്നിങ്സ് ഡിക്ലയര്‍ ചെയ്തു. ഇന്നിങ്സ് തുടക്കത്തിലെ ആക്രമിച്ച് കളിക്കാന്‍ ശ്രമിച്ച് വേഗത്തില്‍ സ്‌കോര്‍ നേടുകയെന്നതായിരുന്നു ഓസീസിന്റെ തന്ത്രം. എന്നാല്‍ ബാറ്റര്‍മാരെ പെട്ടെന്ന് തന്നെ പുറത്താക്കി ഇന്ത്യ സ്‌കോറിങ് വേഗം കുറച്ചു. ഇതോടെ സമനിലയിലേക്ക് പോകുമെന്ന തോന്നിച്ച മത്സരത്തില്‍ ഓസ്ട്രേലിയ ഡിക്ലയര്‍ ചെയ്യുകയായിരുന്നു.